Jakarta (Indonesia) – VDB (Volontarie di Don Bosco) maka grupu ida leiga konsagrada nian, ne’ebé Beatu Filippo Rinaldi mak harii, hola-parte Família Saleziana, nune’e, moris tuir espiritualidade saleziana. Sira moris iha ema sira nia leet, ho empeñu iha okupasaun loroloron nian, iha atividade profisionál oioin, atu halo prezente Maromak nia domin iha ambiente sekulár. Sira mós halo votu sira kastidade, pobreza no obediánsia nian hodi sai sasin radikalidade domin nian lahó distinsaun ba ema sira.
Iha Jakarta iha aspirante ida (Eka) no pre-aspirante ida (Anastacia) ne’ebé hahú sira nia dalan formasaun nian ho P. Padilla nu’udar sira-nia formadór. Sira iha programa formasaun no retiru fulan ida dala ida. Nune’e mak ohin sira halo loron sorin retiru nian ho tema “Eukaristia iha ha’u ni amoris”. Tema ne’e la’o hamutuk ho tinan eukarístika arkidioseze Jakarta nian. P. Padilla lori sira atu hakle’an orasaun tuir VDB nia regra moris nian nune’e,katak eukaristia mak bee-matan espiritualidade VDB nian. Eukaristia nu’udar tutun orasaun hotu nian, sai sentru moris nian, bee-matan ba fiar, esperansa no halo konsagrada/u ida hetan kbiit atu fahe nia moris hanesan paun eukaristia nian, paun domin nian. Sira mós halo adorasaun eukarístika no hafoin reza hamutuk ho irmán FMA sira orasaun vésperas nian. Hotu tiha vésperas, iha Bonoite, P. Padilla husu atu reza ba vokasaun ba VDB sira nian atu bele iha tan ema barani hatán ba bolun atu sai masin no roman iha sosiedade nia laran, hodi sai sasin Maromak nia domin iha mundu nia laran. Hamutuk provínsia ITM SDB (Timor-Indonesia) iha ona leiga ida ho votus no tolu seluk sei iha dalan formasaun inisiál.
