Fatumaka – Inisiativa ne’ebé encarregado Aspirantado Salesiano Fatumaka; padre Matias Pinto SDB hamutuk ho komisaun ne’ebé forma husi alunus Assales sira, husu atu iha 16 Marsu 2019 bele hato’o ba sira informasaun ruma kona Primeiros Socorros / tulun dahuluk ne’ebé ita bele halo atu tulun ema seluk wainhira sira hetan dezastre ruma. Sira ne’ebé tuir formasaun ne’e hamutuk 71 pessoas, husi primeiru Ano to’o terseiru Ano. Formasaun ne’e fasilita husi Ir Yasintha Hoar.
Durante minutu ruma nia laran hato’o ba sira koñesimentu ruma kona ba saida mak Primeiros Socorros ho ninia objetivu, saida mak ita sei halo wainhira ita hetan ita nia maluk ruma iha situasaun ne’ebé husu ita nia tulun dahuluk molok lori ba centru saude. Hafoin iha oras ida nia laran sira halo pratika ruma entre sira, oinsa atu halo asaun lalais.
Primeiros Socorros hanesan tulun dahuluk/ ajuda ne’ebé ita halo lalais ba ema ruma wainhira hetan dezastre ruma. Ho ninia objetivu mak prevensaun ba mortalidade, prevene atu la bele sai grave, prevene atu labele dezabilitadu no prevene infeksaun ruma. Asaun imediata ruma ne’ebé bele halo lalais wainhira ema ruma hetan hemorajia makaas tanba hetan asidente ruma, iis ne’ebé para derepente, hemu veneno ruma, no dezordem jeral ruma hanesan (desmaia /pingsan, shock ruma, mout iha tasi ka pisina, kanek nst).
Esperiénsia ne’e, halo alunu hirak ne’e sente haksolok liu tanba sira dehan ne’e Esperiénsia dahuluk kona ba koñesimentu Primeiros Socorros nian no sira hein atu iha tan formasaun ruma kona saude nian.
(Yasintha Hoar Bria)
