Misaun mak sentru (fuan) fiar sarani nian
Maun alin doben sira,
Tinan ida ne’e mós Loron Misaun Mondiál nian sei halibur ita hale’u Jesus, “Ida ne’ebé dahuluk no Evanjelizador boot liu” (Paolo VI, Esort. Ap. Evangelii nuntiadi, 7) ne’ebé kontinuamente haruka ita atu haklaken Evanjellu domin Aman Maromak nian hodi Espírito Santo nia kbiit. Loron ida ne’e konvida mós ita atu reflete dala ida tan kona-ba misaun mak sentru fiar sarani nian. Tan ne’e, misaun mak Kreda nia natureza; se la nu’une’e karik, sei laós ona Kreda Kristu nian, maibé hanesan de’it asosiasaun ida entre asosiasaun seluk-seluk, ne’ebé sei lakun mohu lalais ninia finalidade rasik. Tamba ne’e ita simu bolun fo atensaun perguntas ne’ebé kona loos ita nia identidade nu’udar kristaun no ita nia responsabilidade fiar nain nian, iha mondu ne’ebé moris iha duvida ho ilusaun oi-oin, kanek ho frustrasaun boot no funu sira ne’ebé haterus liu mak ema kiik no kiak sira. Sa’ida mak fundamentu misaun nian? Saida mak sentru (fuan) misaun nian? Sa ida deit mak atitude vital misaun nian?
