Domingo, 4 Desembru, oras tuku 10.00 dader iha Salão Arquidiocese Dili-Lecidere. Foinsa’e Movimento Juvenil Salesiano ho Me. Julia, FMA no Me. Domingas Pereira, FMA partecipa ho laran tomak ba komisaun organizadora JMJ Lisboa CNJCTL nia apelu hodi halibur-an hamutuk ho juventude COJUCAD no grupu kategoriais oin oin husi Parokia no Kongregasaun sira iha Dili laran hodi tuir Socializasaun kona ba Jornada Mundial Juventude (JMJ) Lisboa 2023, husi delegasaun sira nebe mai husi Lisboa mak Pe. Duarte da Cunha, Madre Lara Marlin no foinsa’e Mariana Rego. Sira nia presenza ho objetivu hala’o sosializasaun kona ba JMJ ne’ebé sei realiza husi loron 31 fulan julho to’o dia 6 agosto 2023. Sira nia presenza desafia tebes foinsa’e Kreda Timor liu-liu fo aten brani ba foinsa’e, Padre, Madre no leigus sira atu bele partecipa fisikamente iha eventu Kreda Universal. Ba foinsa’e barak ne’ebé tan montante boot sei la marka presenza iha Lisboa maibe nu’udar juventude Katolika sente hola parte ba JMJ hodi haklean no halo dalan fiar nian hamutuk maske liu husi online, Foinsa’e keta indiferente maibe sente -an foinsa’e ne’ebè moris no sente hola parte ba identidade ida.
Iha Sosializasaun ida ne’e Padre Duarte esplika uluk knanain kona ba Lema no Tema JMJ nian “Maria hamriik no ba lalais”. Tema ne’ebé Amo Papa hili ho intensaun atu tulun foinsa’e sira sai protagonista lolos iha sira nia fiar, foinsa’e ne’ebé hamrik no la’o lalais ba misaun. Foinsa’e la’o ba misaun ho Jesus hanesan Maria ne’ebé simu tiha anjo nia lian, nia hamriik lalais kedas hodi lori Jesus ba nia prima santa Isabel. Objetivu husi JMJ 2023 mak atu foinsa’e sira bele hasoru malu pesoalmente ho Jesus no ho Santo Padre. Sira mos sei moris momentu fiar, paz, amizade, uniaun no sai protagonista iha misaun Evanjelizasaun nian, tamba Evanjellu la iha fronteira. Tan ne’e foinsa’e keta tur metin maibe book an, hamriik la’o ba oin. La’o ho Jesus hanesan Maria.
Tuir mai Padre apresenta mos santo no santa sira ne’ebè sai mahein ba JMJ iha Lisboa mak uluk knanain S. João Paulo II ne’ebé hahu historia JMJ. Santo ida ne’ebé iha domin boot ba foinsa’e sira, iha mos S. João Bosco aman, belun no mestri ba foinsa’e sira no ho santo sira seluk. Entre sira iha santo foinsa’e sira ne’ebè brani tebes fo sasin kona ba sira nia fiar. Santo no santa sira sai mahein ba JMJ atu husu sira nia intersesaun no atu imita tuir sira nia virtude.
Saida mak sei akontese iha Lisboa husi dia 31 Julho to’o dia 6 Agosto 2023? Ir. Lara apresenta aktividade kada loron. Nia haktuir katak sei akontese durante semana rua nia laran. Semana dahuluk kona ba pre- jornada Nazional Diocese sira iha Portugal no semana JMJ. iha semana JMJ ne’e foinsa’e sira sei moris tuir Maria nia atetude hodi moris, sei iha katekese husi Bispu sira, rekonsiliasaun, peregrinasaun, momentu ksolok hodi simu Amo Papa Fransisco, Viasacra, expo vokasaun no ho kalan kultura husi Nasaun oin oin husi mundo tomak, Timor mos sei apresenta ninia kultura no arte. Iha kalan vigilia ho klima orasaun no silensio. Foinsa’e sira hatudu identidade kristaun lolos. Eventu ida ne’e ba foinsa’e kristaun maibe la taka odamatan ba sira ne’ebé fiar diferente no ba kaben nain foinsa’e sira. Delegasaun sira konvida no fo korajen tebes ba MJS atu fo importansia ba JMJ no keta lakon oportunidade grasa nian.
Depois de sosializasaun ba foinsa’e sira, delegasaun husi Lisboa hasoru malu ho Ministro da Edukasaun iha nia serbisu fatin no ho ninia staf sira. Hodi apresenta eventu JMJ ba sira, no momentu fraternizasaun hamutuk hodi husu mos apoio ba foinsa’e sira,
Agradese ba CNJCTL ne’ebé organiza ona sosializasaun ida ne’e no visita mos iha uma Salesiana iha Komoro. Kona ba registo bele kontaktu ho CNJCTL. Ba MJS, Magis no embaxador domin nian ka Kongregasaun seluk bele halo registro no husu informasaun ba ida idak nia responsavel, Viajen ketak ketak maibe sei hetan malu iha Lisboa nudar Kreda Timor.
Ikus liu, konvida foinsa’e MJS atu bele halo registrasaun ba JMJ molok tinan foun 2023 atu bele hetan preso baratu ba bilhete, Sosializasaun no formasaun ba JMJ sei kontinua haklean liu husi katekese no formasaun sira lokal no zonal.
Obrigada barak
(Julia Marçal FMA)
