Tuir Kristu auténtiku la dezenvolve liuhosi auto-exaltasaun ka prezunsaun ba kapasidade rasik, maibé liuhosi kapasidade “atu la dezespera, maski iha momentu nakukun nian”, bainhira “ita sente laiha kbiit hasoru problema sira”. Papa Leão XIV subliña ida-ne’e iha ninia katekeze ne’ebé antes Angelus iha Prasa S. Pedro iha Domingu ne’e, 9 Agostu, Domingu da-19 iha Tempu Ordináriu. Amu-Papa komenta kona-ba pasajen husi Evanjellu Mateus nian iha-ne’ebé Jezús “iha tasi Galileia nian, hodi to’o ba dixípulu sira iha tempestade nia leet, la’o iha bee leten”.
Tauk Hafoin Susesu
Hafoin milagre multiplikasaun paun no ikan nian, Pontífise rezume, Mestre konvida dixípulu sira «atu sa’e ba ró hodi sai oituan ba tasi kle’an», enkuantu nia retira-an ba foho ida atu reza mesak .Ataka husi tempestade ida, iha Tasi Galileia nia klaran, sira na’in sanulu-resin-rua hetan sira-nia baku makas hosi anin, no laloran ne’ebe violentu, no “luta atu ba oin nafatin.”
Hafoin esperiénsia susesu ida, iha ne’ebé sira asiste sinál protagonista prodíjiu ida, agora hetan sira-nia an laiha kbiit no tauk hasoru ameasa laloran nian no anin ne’ebe kontráriu.
“Iha besik rai loron,” Jezús hakbesik ba sira, hodi la’o iha bee ne’ebé maka makas. Apóstolu sira, ta’uk, hodi konfunde nia nu’udar mate klamar ida, maibé Kristu revela an, husu sira atu labele ta’uk: «Imi aten-barani, Ha’u mak ne’e; keta ta’uk!»
Esperiénsia kona-ba ida-idak nia impotensia rasik
Mestre nia prezensa “muda buat hotu.” Pedro hakarak ba hasoru Nia no hakat balun liuhosi laloran sira hodi to’o ba Nia, maibé “depois nia sai ta’uk, mout, no Jezús salva nia.” Bainhira Kristu sa’e ba ró laran, anin-boot hakmatek, no profisaun fiar nian mosu espontaneamente husi dixípulu sira-nia fuan: «Loos duni, Ita-Boot mak Maromak nia Oan-Mane!»
Atu hetan ida-ne’e, la to’o ba sira atu asiste milagre ida, no mós la hetan susesu iha povu nia oin: sira tenke liu husi esperiénsia sira-nia frakeza rasik no rekoñese Maromak nia prezensa. Ho dalan ida-ne’e de’it maka sira bele loke duni sira nia matan no fuan ba Nia aprosimasaun, hetan dame maski iha anin-boot nia leet.
Pasajen Evanjellu domingu ne’e nian, konklui Papa Leão XIV, hanorin katak Jezús la abandona ita, “se ita ho haraik-an simu Nia iha ró ita-nia moris nian”. Iha ita-nia relasaun ho Nia—liuhusi orasaun, Sakramentu sira, no rona Liafuan—ita bele hetan dame, “naroman, no forsa ba ita-nia viajen.”
Fonte: Vatican News
