Tinan 25 iha moris relijioza la’ós deit konta tinan sira ne’ebé liu, maibé istória ida kona ba Maromak nia domin, grasa no fidelidade. Iha dalan ida ne’e, Maromak mak bolu uluk, akompaña no hametin ita iha momentu hotu-hotu: iha tempu alegria no esperansa, maibé mós iha tempu difikuldade, prova no sakrifísiu sira. Haree fila fali ba tinan sira liu ona, bele haree katak vokasaun la’ós obra husi ita-nia kbiit rasik, maibé mak resposta ba Maromak nia bolu nakonu ho domin. Iha loron ida-idak, ita aprende atu entrega ita-nia an ba Nia, atu husik Maromak guia ita-nia dalan no forma ita sai instrumentu ki’ik ida iha Nia liman. Moris konsagrada hanesan Filhas de Maria Auxiliadora (FMA) mak dalan ida atu moris ho Kristu no ba Kristu. Liuhusi konsagrasaun, ami simu misaun atu lori Maromak nia domin ba ema wain, liuliu ba jovem sira, hanesan Don Bosco no Madre Mazzarello husu husi ita: atu sai sinal esperansa, bondade no prezensa Maromak nian iha mundu. Durante tinan 25 ne’e, ami hasoru ema barak ne’ebé Maromak hatama iha ami-nia dalan sira: Madre Jeral ho Madre konsileira sira, Madre Provincial, madre superiora sira, irmás FMA sira, padre sira, família, benfeitores, kolaboradores, labarik no jovem sira. Liuhusi sira, Maromak ko’alia mai ami, hanorin ami kona ba domin, pasiénsia, perdãun, komuñaun no fidelidade ba vokasaun.
Ami mós rekoñese katak dalan fidelidade la’ós sempre fasil. Iha momentu balun, ami hasoru kmaan, saudade, inkompriensaun ka limitasaun rasik. Maibé Maromak nia grasa nunka husik ami mesak. Iha oras sira ne’ebé difisil, Nia mak fó kbiit atu kontinua lao, tanba Nia mak bolu no Nia mak akompaña.
25 anos vida relijioza mak konvite ida atu agradese no renova kompromisu. Agradese ba Maromak tanba Nia domin ne’ebé la muda. Agradese ba Inan Maria Auxiliadora tanba nia tau matan, gia no akompaña nafatin. Agradese ba Don Bosco no Madre Mazzarello tanba karizma ne’ebé kontinua moris no guia ami-nia misaun.
Ohin, ho laran hakmatek, ami bele dehan: “Maromak, obrigadu ba buat hotu ne’ebé Ita halo iha ami-nia moris.” ami la hatene saida mak sei mai iha oin, maibé ami fiar katak se Maromak mak hahú dalan ida ne’e, Nia sei kontinua lori to’o rohan.
Futuru katak: iha tinan sira ne’ebe mai, sai oportunidade atu haburas liután ami-nia domin ba Kristu, fidelidade ba Igreja, komunhaun iha komunidade no dedikasaun ba labarik no jovem sira nebe presiza liu.
Reflesaun kona ba Simbolu Rosa iha 25 anos vida relijioza: “Maromak nia Domin halibur, Konsagra no Haruka”
Iha selebrasaun 25 anos Vida Relijioza, ami hili rosas hanesan simbolu ida ne’ebé hatudu Maromak nia domin ne’ebé sempre akompaña ami-nia dalan. Rosa mak aifunan ida ne’ebé furak no iha nia laran iha mistériu ida: nia beleza mai hamutuk ho nia espinu sira. Nune’e mós iha moris konsagrada. Maromak bolu ami ba dalan domin nian, maibé dalan ida ne’e la’ós sempre fasil. Iha alegria no konsolasaun, maibé iha mós sakrifísiu, renúnsia no dezafiu sira. Maibé iha buat hotu, Maromak nia domin mak fó kbiit atu kontinua.
“Maromak nia Domin halibur”
Rosa hatudu katak ami-nia vokasaun hahú husi Maromak nia bolu domin. Nia mak halibur ami husi família, kultura no istória diferente sira, hodi forma ami sai família ida iha komunidade FMA. Iha tinan 25 ne’e, ami haree katak la’ós ami mak hili mesak dalan ida ne’e, maibé Maromak mak uluk hili no halibur ami iha Nia domin.
“Maromak nia Domin konsagra”
Hanesan rosa ne’ebé entrega nia beleza ba ema sira, vida konsagrada mak entrega-an tomak ba Maromak. Liuhusi votos relijiozu, ami hatán ba bolu Maromak nian atu sai sinal ki’ik ida husi Nia prezensa iha mundu. Konsagrasaun la’ós deit serimónia ida, maibé dalan moris loroloron ho fidelidade, humildade no domin.
“Maromak nia Domin haruka”
Rosa la moris ba nia an rasik; nia fó beleza no perfume ba ema seluk. Nune’e mós FMA sira simu misaun atu sai rosa ida iha jardim Igreja nian: lori Kristu nia domin ba jovem sira, ba família sira no ba ema sira ne’ebé Maromak entrega mai ami. Haruka hodi servisu, edukasaun no evangelizasaun, ho espiritu Don Bosco no Madre Mazzarello.
Iha remata tinan 25 ida ne’e, ami la haree deit ba buat ne’ebé liu ona, maibé ho esperansa haree ba dalan oin mai. Rosa ida ne’e sai sinal kompromisu foun: kontinua moris ho domin, fidelidade no disponibilidade ba Maromak nia misaun.
Ho Maria Auxiliadora, Rosa Mistika ne’ebé lori ita ba Jesus, ami hateten:“Na’i, ami agradese ba domin ne’ebé halibur ami, konsagra ami no haruka ami. Kontinua forma ami sai rosa ida ne’ebé fó perfume Kristu nian iha mundu.” Maromak nia domin mak hahú ami-nia dalan, akompaña ami-nia moris no lori ami ba misaun.
“Maromak nia Domin halibur, konsagra no haruka”
Ho laran nakonu ho ksolok no gratidaun, ami hakarak hato’o ami-nia obrigadu wa’in ba ema hotu ne’ebé akompaña ami. Iha momentu ida ne’e, ami uza simbolu rosa atu hato’o ami-nia agradesementu, tanba rosa hatudu Maromak nia domin ne’ebé halibur, konsagra no haruka
- Rosa nia abut mak hatudu Maromak, fonte husi buat hotu. Nune’e, ami agradese uluk ba Maromak, tanba Nia mak hodi nia domin bolu ami, sustenta ami no lori ami to’o iha tinan 25 Vida Relijioza. Sem Maromak nia graça, ami la bele to’o iha momentu ida ne’e.
- Rosa nia isin no nia tahan sira hatudu komunidade no ema sira ne’ebé sai parte husi ami-nia dalan. Ami agradese ba Kongregasaun Filhas de Maria Auxiliadora, ba Superiora sira, Irmã FMA hotu-hotu no komunidade sira ne’ebé simu, forma no akompaña ami ho domin. Imi hotu sai tahan sira ne’ebé ajuda ami hamrik no moris iha fidelidade.
- Rosa nia tarak sira hanorin ami katak iha dalan vokasaun nian iha mós momentu difisil sira. Ami agradese ba ema sira ne’ebé la husik ami mesak iha tempu prova, maibé fó korajen, oração no apoiu atu ami kontinua.
- Rosa nia furak no nia perfume mak simbolu misaun ne’ebé Maromak entrega mai ami. Ami agradese ba Padre Salesiano sira, Família Salesiana, benfeitor sira, colaborador sira, jovem sira no ema hotu ne’ebé servisu hamutuk ho ami. Liuhusi imi, ami aprende atu fahe Kristu nia domin no sai sinal esperansa ba ema seluk.
- Ba ami-nia família, ami hato’o agradecimentu espesiál. Obrigadu tanba imi mak sai fatin uluk ne’ebé Maromak uza atu kuda no haburas ami-nia vokasaun. Ami-nia susar no alegria sira imi simu hamutuk ho ami.
- Ba ema hotu ne’ebé mai no marka prezensa iha festa ida ne’e, imi mak sai rosa sira iha jardim Maromak nian. Ita-nia prezensa, oração, amizade no partisipasaun halo loron ida ne’e sai furak liután.
Husi laran tomak, ami hato’o:
Obrigadu ba imi hotu ne’ebé ajuda ami atu moris no sai rosa ida ne’ebé halibur, konsagra no haruka hodi fó profumo Kristu nia domin iha mundu.
Maria Auxiliadora nafatin proteje no akompaña imi ida-idak.
Obrigadu wa’in. Maromak fó bênsaun barak ba ita hotu.
Sr. Esmeralda Soares,FMA no Sr. Paulina de Sousa Correia,FMA
