Iha Angelus husi Castel Gandolfo, Pontífise fó komentáriu kona-ba Evanjellu domingu nian, ne’ebé nia protagonista mak feto Kananea ne’ebé ho firmeza husu ba Jezús atu kura nia oan-feto. Husi epizódiu ne’ebá, “ita aprende katak Maromak nia meza preparadu ba ema hotu,” tanba ne’e maka dezigualdade, diskriminasaun, no “barreira sira ne’ebé hanehan dignidade” ema barak nian la aseitavel. «Iha enkontru hotu-hotu, maski sira ne’ebé perturba ita-nia planu sira», ita tenke loke «ita-nia fuan ba buat ne’ebé Maromak hakarak hateten mai ita».
Haraik-an no determinasaun. Ne’e mak karakterístika sira ne’ebé distinge feto kananea, protagonista Evanjellu domingu nian, ne’ebé «buka ho insisténsia atu ko’alia ho Jezús» no tuir nia hodi husu nia atu kura nia oan-feto. Iha Angelus loron 16 Agostu 2026, hosi Palásiu Apostóliku Castel Gandolfo nian, ne’ebé haree ba Prasa liberdade nian, Amu-Papa evidensia, hodi konsentra iha feto ne’e nia fiar, ne’ebé, “maske la pertense” ba povu Judeu “no moris iha rejiaun estranjeira ida”, fila ba Jezús ho firmeza “rekoñese nia nu’udar Mesias husi desendente David nian” no “fiar” iha Nia, ho serteza katak nia orasaun sira sei rona.
Tanba nia fiar, ita aprende katak Maromak nia meza prepara ona ba ema hotu no katak laiha ema ida maka hetan ninia rahun, tanba ema hotu iha nia fatin rasik ho Aman.
Kreda ida ne’ebé buka dame
No nune’e, habelar ita-nia hateken, ho matan fiar nian, ita labele ignora ba buat ne’ebé akontese iha realidade kontemporánea, iha kontinente lima.
Iha roman fiar ida-ne’e nian, dezigualiansa, diskriminasaun no barreira sira ne’ebé maka hanehan dignidade hosi Maromak nia oan-mane no oan-feto barak liu sai insuportável. Maun alin doben sira: ita mak Jezús Kristu nia Kreda iha mundu ne’ebé terus, mundu ne’ebé buka dame.
Husik ita nia an atu hetan surpreza
Maibé iha lisaun seluk atu aprende husi pasajen Evanjellu loron ne’eba nian, Papa Leão nota: “Iha enkontru hotu-hotu, maski sira ne’ebé perturba ita-nia planu sira, ita tenke rona, loke matan no loke ita-nia fuan ba buat ne’ebé Maromak hakarak hateten mai ita”. Jezús, ne’ebé inisialmente “reziste” feto Kananea nia “pedidu” tanba, retira tiha ba área Tiro no Sidon nian, nia provavelmente buka hela “fatin izoladu ida iha ne’ebé nia bele reza no hanorin nia seguidor sira” atu kumpre “nia misaun”, hafoin husik nia an atu sai involve “ho saida maka nia haree no rona”. To’o ikusmai nia hateten ba feto: “Ita-boot nia fiar boot! Husik ida-ne’e sai ba ita-boot tuir ita-boot nia hakarak.”
Ohin loron mós, Igreja bele hetan surpreza ho Maromak nia obra no komunika Kristu nia dame liu fatin sira ne’ebé estabelese ona. Ninia misaun antisipa husi grasa divina, ne’ebé opera iha segredu konxiénsia nian.
Kristu nia Moris-Hi’as maka Moris Foun
Amu-Papa nia liafuan sira mós halo referénsia badak ba solenidade, Asunsaun Santa Virjen Maria nian, ne’ebé konvida ita atu kontempla “relasaun indisolúvel” entre Jezús no nia inan no “komuñaun isin no klamar nian”, aleinde mate, “ne’ebé mak moris rohan-laek”. “Plenitude” ne’ebé “rezerva hela ba sira ne’ebé tuir Jezús”, hanesan Pontífise fó hanoin mai ita “domingu hotu-hotu”, tanba Kristu nia “moris-hi’as” “la’ós akontesimentu pasadu ida, maibé moris foun ida ne’ebé envolve ita”. Ida-ne’e maka buat ne’ebe feto Kananea hatudu.
Hafoin orasaun no saudasaun Angelus nian, Papa Leão XIV ho karreta golf liuhosi prasa libertasaun nian hodi para iha sarani sira ne’ebé halibur hamutuk hodi rona nia. Entre peregrinu sira ne’ebé halibur iha barreira sira nia sorin, Amu-Papa fó bensaun ba labarik sira, para atu ko’alia ho ema ruma, no hetan dezeñu husi labarik sira ne’ebe fo ba nia no fahe liafuan uitoan ho nia. Ikusmai, Pontífise fila hodi kumprimenta ema-lubun dala ida tan, hafoin nia sai no la’o ba Palásiu Apostóliku, iha ne’ebé nia sei hela to’o loron-tersa, 18 Agostu.
Fonte: Vatican News
