Dili – Loron 18 Maiu ne’e, p. Andre Wong SDB, Konselleiru Vizitadór ba rejiaun Ázia-Pasífiku konklui ninia vizita estraordinária mai Timor-Leste durante fulan ida resin ho selebrasaun eukarístika ho membru Famíla Saleziana prezente iha Dili. Hafoin agradese ema hotu no liuliu P Pascual Chavez, Reitór-Mór ne’ebé haruka nia mai hodi ninia naran, nia konvida membru hotu atu tuir Don Bosco maibé la para de’it iha Don Bosco, basá Don Bosco sei kontente liu se husi nia ita bá to’o Jezús. Dala barak iha ita-nia vida ita husik Jezús iha kotuk de’it, maibé loloos la iha ema ida ne’ebé bele moris se laiha Jezús iha nia kotuk ho ninia atensaun , ninia domin boot. Nune’ nia dehan katak ita-nia knaar mak agradesimentu loroloron ba grasa ida-ne’e.
Parte seluk reflesaun nian liga ho Solenidade Nai Jezús Sae ba Lalehan hanesan tuirmai ne’e: « Ita atu selebra Jezús nia fila-fali ba Aman Maromak depoizde ninia hatudu an ba apóstolu sira liu tiha ninia moris-hi’as. Saida mak Jezús hakarak hateten mai ita? Katak ita mós labele hela de’it iha mundu, ita-nia uma permanente la’ós iha mundu. Nia bá uluk prepara fatin mai ita. Maski ohin loron iha tentasaun barak liuliu iha domíniu materiál (ida-ne’e mak ita ema nia frakeza), ita hahú haluha ona Sé mak ita-nia forsa, itelijénsia no kapasidade nia hun. Iha ha’u-nia estadia iha Europa no hodi rona maluk salezianu sira husi rai riku sira ha’u hanoin oinsá rai hirak ne’e haluha Maromak, laós de’it haluha maibé, kontra Maromak hodi dehan katak la iha Maromak basá sira de’it maka Maromak.
Iha domingu Axensaun bainhira Jezús hateten nia fila ba Aman Maromak , Lukas dehan apostólu sira haksolok liu. Amu-Papa Bento halo komentáriu ba ida-ne’e iha ninia livru ho títulu “Jesus de Nazaré”, nia husu tanba sá bainhira sira-nia Nai husik sira haksolok tan… Tanba bainhira Jezús sae ba Lalehan ba nia Aman, nia la bá fatin ida. Aman Maromak iha fatin hothotu, iha mundu no liu mundu. Ita ema, presiza fatin ida, ita mate presiza rate ida atu hakoi, maibé Maromak la presiza, Nia la mate. Entaun bainhira Jezús fila fali ba Maromak ne’e katak sá? Ne’e katak iha momentu Nia fila fali ba Aman Maromak Nia sai ida de’it ho Aman, iha perfeisaun ho Aman nia divindade no Espíritu Santu. Ne’e la’ós atu fó hatene de’it mai ita, ita sei bá ne’ebé: ita bá Lalehan. Fatin? La iha. Loron ida mós ita sei hamutuk ho divina Trindade iha perfeisaun santidade no domin nian. Ida-ne’e mós atu dehan katak oras ne’e Jezús hamutuk ho ita liufali uluk Nia sei la’o iha rai sira Izraél nian, Judeia nian, iha Jeruzalém nu’udar ema. Tanba Nia moris-hi’as no sae ba Lalehan hamutuk ho Aman Nia besik liu ita ida-idak. Tuir loloos Santu Agostinho, Amu-Papa Bento nia santu preferidu hateten katak Nai Maromak koñese ita ida-idak liu fali ita koñese ita-nia an rasik. Tanba ninia domin, ninia komuñaun no uniaun ho ita no karik ita labele komprende maibé bele esperiénsia iha moris.
Entaun maun-alin sira, nu’udar Família saleziana ho Don Bosco, ho Nai-Feto Ausiliadora no ho ita-nia maluk sira hotu nu’udar membru Família, mai ita promete ba Nai Maromak atu ita hametin ita-nia unidade, ita-nia komuñaun ba malu. Tanba komuñaun ida-ne’e sei lori ita ba komuñaun ho Don Bosco no Don Bosco sei lori ba Nai Jezús. Atu bainhira loron to’o mai ita atu mós sae ba Lalehan fila fali ba ita-nia Aman Maromak, ba Jezús no Espíritu Santu, ita la ta’uk tanba loroloron ita prepara ita-nia an atu sai ida de’it ho Trindade».
(COMSOC FMATIN)
