RV/Redasaun – Amu-Papa dedika ninia katekeze ikus, iha loron 28 molok férias bailoron nian ba tema “esperansa nu’udar martir sira nia forsa”.
Hodi haruka dixípulu sira ba misaun, Jezús adverte katak anúnsiu Reinu nian komporta nafatin opozisaun ida: “Ema sei rai kunan ba imi tan ha’u-nia naran”. “Sarani sira hadomi, maibé nein sempre ema hadomi sira”, Amu-Papa hateten. Tanba ne’e, sarani sira mak mane no feto sira kontrakorrente, ne’ebé moris tuir estilu ida Jezús hatudu, “estilu esperansa nian”.
Kbiit ida mesak mak Evanjellu
Atu sai hanesan Kristu, presiza haketak an husi rikusoin sira no podér. Ema sarani halo ninia dalan ho esensiál, maibé ho fuan nakonu ho domin. Defaktu, nia labele uza violénsia. Nia kbiit ida mesak mak Evanjellu. Persegisaun, la’ós kontradisaun ida. Se sira persege Mestre tanba sá ita tenke preokupa ho luta? Maski nune’e, iha funu nia klaran, sarani nunka lakon esperansa. Iha Ida ne’ebé forte liu buat aat: forte liu máfia sira, liu sira ne’ebé manán husi ema dezesperadu sira, sira ne’ebé hanehan ema seluk ho sira-nia prepoténsia.
Perfume dixipuladu nian
Fidelidade ba Jezús nia estilu ida-ne’e, sarani dahuluk sira hanaran “martíriu”, ne’ebé signifika “testemuñu”. Vokabuláriu oferese posibilidade sira seluk: eroízmu, saran an, sakrifísiu an rasik nian. Maibé ema sarani dahuluk hili naran ida “ho perfume dixipuladu nian”.
“Martir sira la moris ba an rasik, la hafunu atu afirma ideia rasik, no aseita atu mate tanba de’it fidelidade ba Evanjellu. Martíriu la’ós ideál aas liu moris sarani nian, basá aas liu mak karidade, katak, domin ba Maromak no ba maluk sira. Ideia ema ne’ebé komete atentadu hodi oho an hanaran martir sarani sira hakribi: iha hahalok ne’e, la iha buat ida ne’ebé besik ba atitude Maromak nia oan sira-nian.
“Atu Maromak haraik nafatin forsa atu sai ninia sasin sira. Atu Nia haraik mai ita moris esperansa sarani liuliu martíriu konfidensiál halo di’ak nian no ho domin ita-nia devér sira loroloron nian”.
