Iha katekeze kuarta 13 Setembru, Papa Francisco ko’alia kona-ba ninia viajem ba Colômbia, husi 6-10 Setembru. Amu-Papa hanoin hikas momentu signnifikativu sira oinsá Colômbia simu nia, ne’ebé nia define nu’udar povu “haksolok, maski iha terus barak nia laran”.
“Buat ne’ebé dada ha’u-nia atensaun mak ema lubun-boot no aman-inan sira ne’ebé foti sae sira-nia oan atu Amu-Papa fó bensan. Sira halo hanesan atu hatudu sira-nia orgullu, sira-nia esperansa. Povu ida ne’ebé halo nune’e mak povu id ane’ebé iha futuru”, Papa Francisco afirma.
Amu-Papa temi lema ka motto ba ninia viajen, “Ita halo ain-hakat dahuluk”, ne’ebé refere ba prosesu rekonsiliasaun ne’ebé Colômbia moris daudaun atu sai husi tinan 50 iha konflitu internu.
“Ho ha’u-nia vizita, ha’u hakarak fó bensan ba pvu nia esforsu, konfirma nia iha fiar no esperansa, no simu ninia sasin, nu’udar rikusoin ba ha’u-nia ministériu no ba Igreja tomak”, nia hateten.
Iha Bogotá, Papa Francisco hasoru autoridade sira, bispu sira país nian no mós “Comitê do Conselho Episcopal Latino-Americano” (CELAM), fó ninia enkorajamentu pastorál. Iha kapitál, Papa Francisco dirije ninia saudasaun mós ba joven sira, iha-ne’ebé nia nota sira-nia hakaran ba vida no pás, “forsa moris nian ne’ebé natureza rasik haklaken ho ninia kbiit tomak”, Amu-Papa Francisco afirma, hodi fó hanoin katak Colômbia mak país daruak riku liu iha biodiversidade.
Villavicencio
Villavicencio mak fatin ba momentu tutun ninia viajen. Iha ne’e mak dedika loron ba rekonsiliasaun, hahú uluknanai ho Missa beatifikasaun ba mártir na’in rua: Jesús Emilio Jaramillo Monsalve no Pedro Maria Ramírez Ramos, no depois ho enkontru orasaun nian ba rekonsiliasaun nasionál.
Beatifikasaun ba mártir sira fó hanoin dame dalaruma presiza mós fakar raan hsui sasin sira domin nian.. Para Francisco, sente komosaun rona sira-nia biografia moris nian to’o matan-been suli, matan-been terus no ksolok nian. Iha enkontru orasaun, sasin sira ne’ebé ko’alia hodi ema seluk nia naran, dehan katak husi sira-nia kanek, ho Kristu nia grasa sira sai husi an rasik no loke an ba enkontru, perdaun no rekonsiliasaun.
Papa Francisco remata ninia katekeze hodi konfia hikas Rai Colômbia no ninia povu ba “Nossa Senhora de Chiquinquirá”. “Hodi Maria nia tulun, kolombianu ida-idak bele halo ain-hakat loroloron iha diresaun ba maun no biin-alin, no nune’e harii hamutuk, loron ba loron, pás iha domin, iha justisa no iha lia-loos”.
