Iha Domingu II Kuarezma nian, Maromak nia Liafuan define dalan ne’ebé dixípulu loos tenke tuir atu to’o ba moris foun: rona ho atensaun Maromak no ninia projetu sira, obediénsia totál no radikál ba Aman nia planu sira.
Evanjellu relata Jezús nia transfigurasaun. Hodi uza elementu simbóliku sira Testamentu Tuan nian, autór aprezenta mai ita katekeze ida kona-ba Jezús, Aman nia Oan-Mane doben liu, ne’ebé sei konkretiza ninia projetu libertadór ba ema sira liuhusi don moris nian. Ba dixípulu sira, ne’ebé dezanima no ta’uk, Jezús hateten: dalan don moris nian la lori ba frakasu, maibé ba moris nakonu no definitivu. Imi mós tuir nia bá.
Iha leitura dahuluk aprezenta figura Abraaun nian nu’udar paradigma atitude ida-nian iha Maromak nia oin. Abraaun mak ema fiar nian, ne’ebé moris iha raronak/eskuta konstante Maromak nian, aseita Maromak nia apelu sira no hatán ho obediénsia totál (maski planu sira-ne’e kontra ninia mehi no projetu pesoál sira). Iha perspetiva ida-ne’e, Abraaun mak modelu fiar-na’in nian ne’ebé komprende no tuir Maromak nia projetu.
Leitura daruak fó hanoin ba sarani sira katak Maromak hadomi sira ho domin maka’as no rohan-laek. Prova di’ak liu domin ne’e nian mak Jezús Kristu, Maromak nia Oan-Mane doben liu ne’ebé mate atu hanorin ba ema dalan moris loos nian. Nune’e, sarani ida la ta’uk buat ida no tenke enfrenta moris ho hakmatek no esperansa.
