Papa Francisco nia lia-menon molok harohan Angelus iha Domingu II Kuarezma nian (25.02.2024)
Maun no biin-alin sira, ‘buongiorno’!
Evanjellu domingu daruak Kuarezma nian ne’e aprezenta mai ita espizódiu Transfigurasaun Jezús nian (kf Mc 9,2-10).
Depoizde fó sai ba eskolante sira ninia Terus, Jezús lori Pedro, Tiago no João ho Nia, sae foho aas ida no iha-ne’ebá manifesta An fizikamente iha ninia naroman tomak. Nune’e nia hatudu sai ba sira sentidu kona-ba saida mak sira haree hamutuk to’o momentu ne’ebá. Pregasaun Reinu nian, perdaun salan sira-nian, fó isin di’ak no sinál sira Nia halo mak defaktu nu’udar ahi boot ninia lutan nabilan sir: Jezús nia roman, Jezús nu’udar roman nabilan. No husi naroman ne’e mak eskolante sira labele hateke sees, liuliu iha momentu prova nian, hanesan ida besik ba Paixaun.
Ida-ne’e mak mensajen: keta hasai ita-nia hateken sira husi Jezús nia naroman. Uitoan hanesan to’os-na’in sira halo, bainhira fila rai, sira hateke metin iha pontu ida iha sira-nia oin no, no hodi fihit metin ninia rohan, sira fila rai hodi halo liña loos. Ida-ne’e mak ita simu bolun atu halo, ita sarani sira iha dalan moris nian: iha fihir metin Jezús nia futar oin nabilan, keta hateke sees husi Jezús.
Maun no biin-alin sira, mai ita loke an ba Jezús nia roman! Nia mak domin, Nia mak moris rohan laek. Iha dalan moris nian, dalaruma kleuk, ita buka nia futar oin, nakonu ho mizerikórdia, fidelidade, esperansa. Buat ne’ebé tulun atu halo mak orasaun, rona Liafuan, Sakramentu sira: orasaun, rona Liafuan no Sakramentu sira tulun ita atu fihir metin iha Jezús. No ida-ne’e mak propózitu di’ak ida ba Kuarezma: kuda matan nakloke, sai “makbukak roman nian”, makbukak Jezús nia roman iha orasaun no iha ema sira.
Nune’e, mai ita husu ba an rasik: iha ha’u-nia dalan, ha’u-nia matan sira fihir metin iha Jezús ne’ebé akompaña ha’u? No atu halo, ha’u fó espasu ba silénsiu, ba orasaun, ba adorasaun? Ikus, ha’u bá buka Jezús nia naroman maski ki’ik, ne’ebé naksira iha ha’u no iha maun-alin no biin-alin ne’ebé ha’u hasoru? No ha’u hanoin hetan atu agradese Na’i ba buat ne’e?
Maria, nabilan ho Maromak nia roman, tulun ita atu iha matan sira fihir metin iha Jezús no atu hateke ba malu ho konfiansa no domin.
