Liturjia Domingu III Kuarezma nian haktuir Maromak nia preokupasaun atu lori ema hasoru morsi foun. Iha sentidu ne’e mak Maromak nia Liafuan ohin nian aprezenta mai ita sujestaun oioin konversaun no renovasaun nian.
Iha leitura dahuluk, Maromak oferese mai ita indikasaun sira (ukun-fuan) ne’ebé tau baliza ba ita-nia dalan sira moris nian. Indikasaun sira-ne’e kona-ba dimensaun fundamentál rua ita-nia ezisténsia nian: relasaun ho Maromak no relasaun ho maluk sira.
Iha leitura daruak, apóstolu Paulo sujere konversaun ba Maromak nia lójika… Ita presiza deskobre katak ita la hetan salvasaun, moris nakonu, ksolok rohan-laek iha lójika ida podér nian, autoridade nian, rikusoin nian, importánsia nian, maibé iha lójjika krús nian – katak, iha domin totál, iha don moris nian to’o konsekuénsia ikus, iha servisu simples no haraik-an ba maluk sira.
Iha Evanjellu, Jezús aprezenta An nu’udar “Templu Foun” iha-ne’ebé Maromak manifesta An ba ema sira no oferese ba sira ninia domin. Evanjellu konvida ita atu hateke ba Jezús no deskobre iha ninia indikasaun sira, iha ninia anúnsiu, iha ninia “Evanjellu” proposta moris foun nian ne’ebé Maromak hakarak oferese mai ita.
