Papa Francisco nia lia-menon molok Angelus, 28 Fevereiru 2021 – Domingu II Kuarezma nian
Maun no biin-alin sira, bondia!
Domingu daruak Kuarezma nian konvida ita atu kontempla tranfigurasaun Jezús nian iha foho leten, iha ninia dixípulu na’in tolu nia oin (kf Mc 9,2-10). Molok ne’e, Jezús haklaken katak, iha Jerusalém, nia sei terus maka’as, ema sei heuai Nia no halo Nia mate. Ita bele imajina saida mak mosu iha nia belun sira nia fuan, belun íntimu sira, ninia dixípulu sira: ilas Mesias forte no triunfante tama iha krize, sira-nia mehi rahun, no laran-taridu asalta sira bainhira hanoin katak sira nia Mestre ne’ebé sira fiar ema sei oho nu’udar ema-aat piór liu. No iha momentu ne’e duni, iha laran-taridu klamar nian, mak Jezús bolu Pedro, Tiago no João no lori ho Nia ba foho leten.
Evanjellu dehan katak: «Nia lori sira ba foho leten» (v. 2). Iha Bíblia, foho nafatin iha signifikadu espesiál: ne’e mak fatin ida aas , iha-ne’ebé lalehan no rai kona malu, iha-ne’ebé Moisés no profeta sira halo esperiénsia estraordinária enkontru nian ho Maromak. Sa’e ba foho katak hakbesik uitoan ba Maromak. Jezús sa’e ba foho hamutuk ho dixípulu na’in tolu no sira para iha foho nia tutun. Iha-ne’e, Nia transfigura iha sira oin. Nia oin hatudu naroman no nia hatais nabilan, ne’ebé antisipa ilas Moris-Hi’as Na’in nian, oferese ba ema tauk-teen sira ne’e naroman, naroman esperansa nian, naroman atu hakat nakukun sira: mate la’ós buat hotu nia rohan, tanba sei loke hlória Resurreisaun nian. Ne’e duni, Jezús haklaken nia mate, lori sira iha foho leten no halo sira haree saida mak sei akontese depois, Resurreisaun.
Hanesan apóstolu Pedro fó sai (kf v. 5), furak atu para ho Na’i iha foho leten, moris “antisipasaun’ naromanida-ne’e iha Kuarezma nia fuan. Konvite ida atu hanoin fali,, espesialmente bainhira ita liu prova difisil – no imi barak hatene katak sá liu prova difisil ida – ne’ebé Na’i moris hi’as no la husik nakukun iha liafuan ikus.
Dalaruma akontese ita liu momentu nakukun nian iha vida pesoál, familiár no sosiál, no ta’uk katak la iha dalan sai nian. Ita sente ta’uk iha enigma boot sira hanesan moras, terus inosente eh mistériu mate nian. Iha dalan fiar nian mós, dalabarak ita sidi hodi hasoru eskándalu krús nian no ezijénsia sira Evanjellu nian, ne’ebé husu ita atu gasta moris iha servisu no atu lakon nia iha domin, envezde rai mai ita an rasik no defende nia. Ne’e duni, ita iha nesesidade, ba hateken oinseluk, naroman ida ne’ebé leno iha profundidade mistériu vida nian no tulun ita hakat liu ita-nia eskema sira no hakat liu kritériu sira mundu ne’e nian. Ita mós simu bolun atu sa’e foho, atu kontempla beleza Moris-Hi’as Na’in nian ne’ebé halakan roman nia reflessu iha fragmentu ida-idak ita-nia vida nian no tulun ita atu interpreta istória husi vitória Páskua nian.
Maibé, ita iha kuidadu: Pedru ninia sentimentu katak “furak atu horik iha-ne’e” labele sai baruk-teen espirituál ida. Ita labele hele iha foho atu haksolok mesa-mesak rahun-di’ak enkontru ne’e nian. Jezús rasik lori hikas ita ba rai-kle’an, iha ita-nia maun no biin-alin sira nia leet no iha moris loroloron nian. Ita tenke proteje an husi baruk-teen espirituál: ita sente di’ak, ho ita-nia orasaun no liturjia sira, no ida-ne’e to’o ona mai ita? Lae! Sa’e ba foho katak la haluha realidade; harohan la’ós halai sees husi susar sira vida nian; roman fiar nian la serve ba emosaun espirituál furak ida. La’e, ida-ne’e la’ós Jezús nia mensajen. Ita simu bolun atu halo esperiénsia enkontru nian ho Kristu atu, ho nia roman ne’ebé leno, ita bele lori nia no halo nabilan iha fatin hotu. Halakan ahi-oan ki’ik -oan sira iha ema nia fuan; sai uitoan lámpada ki’ik-oan sira Evanjellu domin no esperansa nian: ida-ne’e mak ema sarani nia misaun.
Ita harohan ba Maria Santíssima, atu tulun ita simu ho maravilla Kristu nia roman, rai nia no fahe nia.
