Festa agradesimentu komunidade Maria Mazzarello (Venilale)
Venilale – Dalan komunidade FMA nian “Hamutuk ho foin-sa’e sira” foka liu ba halo sira sai protagonista ba moris rasik. Ne’e mak sai mós tema ba loron agradesimentu komunidade edukativa nian: “Ho joven sira protagonista iha moris rasik”. Modelu protagonizmu juveníl ba trimestre segundu ne’e mak Beatu Pier Giorgio Frassati (modelu ba trimestre dahuluk mak Miguel Magone). Grupu oioin iha ETV Santa Maria Mazzarello, hakle’an aspetu oioin beatu ne’e nia moris nian hanesan vida orasaun, karidade, pobreza, ksolok no amizade ne’ebé ikusmai sira aprezenta fali iha festa agradesimentu komunidade nian ho kriatvidade.
Festa agradesimentu hahú iha semana ida resin antes ho orasaun ba malu liuhusi rozáriu ba membru oioin komunidade edukativa nian (konfesór no kapelaun, kolaboradór/a, profesór/a sira, oratorianu sira, estudante sira, inan-aman sira, benfeitór/a sira, nst) no ho Santa Missa ho intensaun ba obra tolu komunidade nian: eskola, oratóriu no klínika. Loron ikus festa nian mak loron domingu, 16 Jullu, ho intensaun orasaun ba superiora komunidade nian, Ir Floriana Guterres.
Atividade sira hala’o loron ne’e nian hamutuk ho oratorianu, foin-sa’e sira no membru sira seluk komunidade edukativa nian, leigu/a sira mak jogu sira ba labarik anima husi Ir Maria no Ir Libánia, no jogu ba joven sira anima husi Ir Jacinta Gusmão. Jogu ba foin-sa’e sira halo tuir grupu no ho forma kuiz kona-ba Beatu Pier Giorgio Frassati nia moris. Ba labarik sira, joga fera balaun no pasa bola.
Atividade nia sentru mak Eukaristia, orasaun agradesimentu aas liu ba tinan ida-ne’e, ba grasa hotu ida-idak simu liuliu grasa moris no domin nian. Tuir Santa Missa kontinua kedas ho animasaun oioin teatru nian husi oratorianu no husi alunu/a, profesór/a sira no Irmán sira. Iha kalan, depoizde jantár, loron agradesimentu taka ho momentu marianu ne’ebé grupu menina sira-nian mak anima.
Atu Beatu Pier Giorgio ne’ebé sai ona familiár ba joven sira, bele harohan daet ba sira atu sira-nia moris sai moris loos, tanba tuir Pier Giorgio se “Moris lahó fiar ida, laiha mós buat ida atu defende, no la suporta lia-loos hodi luta beibeik, ida-ne’e la’ós moris loos, maibé moris naranaran de’it”.
