Loron 13 desembro, oras tuku 9 dader Madre provincial Sr. Evangelina da Costa Xavier, Sr. Angelita Gomes no Sr. Julia Fernandes partisipa iha inagurasaun ba medical center st. Vincent de Paul iha Maloa ho uma foun ba Komunidade madre husi Kongregasaun sister of charity st. Vincent de Paul. Bensaun ba inagurasaun ne’e husi Sua Eminência Don Virgilio Cardeal do Carmo da Silva, SDB.
Depois de bensaun ba Medical Center, kontinua kedas ho Santa Misa iha fatin refere. iha Homilia Amo Cardeal hateten katak Fatin Ida ne’e sai Centro formasaun no fatin esperansa nian ba hotu. hodi fo hanoin ba sarani tomak katak ohin Santa Kreda ohin celebra santa Luzia virgem no martire. Santa Nia Moris sai roman ne’ebé la mate. Sasin ida ne’e sai konvite atu Ita matan Moris hodi husik Maromak Nia Lia Fuañ gia Ita nia moris. Profeta Elias ho laran Manas lori Maromk Nia Povo ba Maromak. Elias representa ahi nebe hamanas. Ahi atu purifika, ahi atu kuriji no ahi atu restaura. iha tempo advento ita husik atu Maromak Nia liafuan diriji Ita ba dalan los. Halo Ita fila ba dalan los. Ema nebe hatene Maromak Nia kbi’it, hatene nia frakesa sira. Jesus identifika S. João Batista hanesan Elias nebe kontinua haklaken Kona ba konversaun. Amo Cardeal konvida sarani sira atu halakan ahi fiar, esperansa no Domin nian hafoin konvida sarani sira atu Reza atu Fatin Media Center ida ne’e bele sai Fatin formasaun no sai Fatin rekupera saude no klamar nian. ita hatene katak bain-bain iha hospital mak Fatin atu hanoin fila fali kona ba Maromak no sai Fatin atu bele kura moras isin no klamar nian. Medical Center sai fatin ne’ebé halibur ema hotu hodi hahi Maromak.
Remata tiha Santa Misa, sei iha disorso badak sira. Uluk liu hahu Madre Ida Maria membro Kongregasaun nia husu atu hamutuk agradese Maromak tamba bele remata konstrusaun ho ema hotu nia apoio no laran luak no Madre superiora Jeral madre Gabriela Moon hateten iha nia diskursu katak sira nia presenza iha Timor Leste liu husi Amo Cardeal ninia bolu nu’udar Maromak nia bolu ba sira atu hahu misaun iha Timor Leste. Ida ne’e sai momento ksolok nian atu fahe sira nia mehi. Maromak Nia providensia Fo tulun no bolu sira atu hela iha Maloa. Konstrusaun hahu tau fatuk dahuluk iha tinan 2024 no ohin hamutuk halo inagurasaun. Misaun ida ne’e heIn nafatin tulun husi DIocese Dili no husi Governo atu hamutuk bele desenvolve liu tan area saude nian.
Amo Cardeal iha nia diskursu, uluk knanain hato’o ninia gratidaun ba Maromak no ba ema hotu nebe apoio ona. Ohin Nia agradese ba Equipa tomak husi Coreia tan Obra ne serbisu iha Fulan 18 Nia laran deit. iha Medical Center hakerek frase ESPERANSA, hatudu katak fatin Medical Center sai esperansa ba sarani sira iha Maloa no ba Archidiocese Dili. Madre sira nia presenza iha Maloa Maromak mak haruka mai Timor tan Maromak hatene ita terus barak tan falta fasilidade saude nian. ikus Amo Cardeal konvida atu hamutuk ho Kreda bele tau matan ba saude. Tuir mai nia hateten katak fatin ida ne’e sai fatin importante liu atu serbisu hamutuk ho Universidade Catolica (UCT) hodi fo apoio formasaun no sai Fatin pratika ba estudante UCT. Ikus liu Amo Cardeal apela ba povo iha Maloa atu respeita fatin refere no hamutuk tau matan tamba Madre sira harii ba povo timor ba ita hotu no husu ba Madre sira atu kontinua tau matan ba misaun ida ne’e ba tinan barak nia laran nune’e husu atu Madre Jeral bele trasmente ba madre jeral foun atu hare ba misaun iha Timor nia kontinuasaun. Programa inagurasaun remata ho con fraternizasaun.
aproveita hodi apella ba hotu katak aban dia 14 dezembro fatin konsulta livre ba moras hotu. Dotor no especialista sira hotu husi Rai Correia.
Nu’udar Timor oan sente haksolok tebes ho esistensia Medical Center ida ne’e nebe sei serbi maluk moras sira ho domin. Agradese ba Kongregasaun nebe disponivel hodi hatan ba Maromak nia Bolu. Boa misaun no parabens ba Madre sira.
Julia Marçal, FMA
