Iha ninia Mensajen augurio Natál 2025 nian, Superiora Jerál Institutu Filhas de Maria Auxiliadora, Madre Chiara Cazzuola,FMA refere ba karta Saun Paulo nian ba Tito (2,11-14), ne’ebé rona iha Misa Vijilia Natál nian, ne’ebé ninia liafuan abertura nian halian nu’udar mensajen konsolasaun no konfortu boot ida.
Irmán doben sira,
Iha komprementa simples no fraterna ida ne’e, ha’u hakarak refere ba Saun Paulo nia surat ba Tito (2:11-14), ne’ebé ita sei rona iha misa kalan Natál nian.
Liafuan abertura halian nu’udar mensajen boot ida konsolasaun no konfortu nian: «Basa, Maromak nia grasa mosu ona, hodi lori maksoin ba ema tomak, no hanorin ita buat hotu nebe ita sei halo atu husik buat hotu nebe la lori ba Maromak, no mos husik tiha hakarak aat mundu ne’e nian hotu. Ita sei ukun an hodi moris diak no hamtauk Maromak iha mundu ne’e, hodi hein dau-daun Maromak no ita Na’i Jesus Kristu nia gloria. 14Nia saran an ba mate tamba ita atu hasai ita housi ita nia laran aat no hamos povu ida ba Nia An rasik; povu nebe hakarak halo buat nebe diak deit.”.
Maromak nia grasa mosu ona! Grasa ne’ebé promete ona dezde inísiu mundu nian sulin ona ho milagre ba ita-nia rai. Nia maka Labarik ida ne’ebé laiha kbiit, ki’ik no presiza buat hotu. Kosok oan ne’ebe iha hela fetoran ida nia liman, bonita, nakonu ho ternura, kiik oan ida ne’ebé nonook de’it hodi penetra iha istória.
Liurai, moris tanba domin ba umanidade ne’ebé kanek no lakon, tama iha tempu ho konseitu revolusionáriu loloos: nia sei la fahe ai-riin ne’ebé tohik ona, nia sei la hamate ahi ne’ebé lakan, nia sei la julga tuir aparénsia. Ne’e mak invazaun domin divinu nian ne’ebé intervein ho kbiit, liu limite sira ita-nia forsa umana nian, hodi la troka maibé hametin, revela ita-nia ser loloos no bolu ita ba moris, ba responsabilidade atu halo ita-nia parte ho konfiansa, hodi transforma ita-nia frakeza iha forsa atu kumpre Maromak nia vontade. Ne’e maka grasa Maromak nian ne’ebé manifesta iha gratidaun no iha aseitasaun ba buat ki’ik, ka mezmu buat ne’ebé laiha, ne’ebé ita iha, maibé sempre folin-boot iha Nia matan.
Maromak nia grasa mosu ona. Iha kalan Natál nian, ita konsiente katak, maske ita hanoin la to’o tuir buat ne’ebe ita hakarak, Nia halo Nia-an ki’ik ba ita; bainhira ita la’o tuir dalan seluk, Nia mai iha ita-nia leet, Nia halo Nia hela-fatin iha ita-nia leet. Natál fó hanoin mai ita katak Maromak kontinua hadomi ema ida-idak, maski ita dook husi Nia. Nia kontinua hadomi ida-idak lahó distinsaun, no iha Natál Nia repete mai ita: «Ha’u hadomi imi no sei hadomi nafatin imi, imi folin-boot liu iha HA’U-NIA matan». Ninia domin sem kondisaun, la depende ba ita. Dala hira maka ita hanoin katak Maromak di’ak se ita di’ak no katak Nia abandona ita se ita aat. La’os nune’e. Iha ita-nia salan sira, iha ita-nia frakeza sira, Nia kontinua hadomi ita. Ninia domin la muda, la sensivel: maibe Nia fiel, Nia pasiénsia, Nia riku iha mizerikórdia.
Ida-ne’e mak prezente ne’ebé ita hetan iha Natál: deskobre ho surpreza katak Na’i mak laran-luak ne’ebé posivel, ternura ne’ebé posivel. Nia glória la halo ita delek, nia prezensa la hatauk ita. Nia moris kiak iha buat hotu, atu manán ita ho rikusoin domin nian. Tebes duni, Nai Maromak nia grasa mosu mai ita!
Natal ida ne’e mós, nia grasa mosu mai ita!
Se ita-nia liman parese mamuk, se ita-nia fuan maran uitoan ka laiha domin, kalan ida-ne’e maka hahalok domin nian ba ita.
Lenda ida haktuir katak, iha Jesus nia moris, bibi-atan sira halibur iha fatuk-kuak ho prezente oioin. Ida-idak lori buat neʼebé nia iha, balu lori fruto husi sira-nia serbisu, balu lori buat neʼebé folin-boot. Enkuantu ema hotu fó ho laran-luak, iha bibi-atan ida ne’ebé laiha buat ida. Nia kiak tebes, nia laiha buat ida atu oferese. Enkuantu ema hotu kompete hodi aprezenta sira nia prezente, nia hamriik iha sorin, ho moe. Iha pontu ida, José no Maria sente susar atu simu prezente barak, liuliu Maria, Inan, ne’ebé tenke sustenta Oan. Depois, haree bibi-atan ho liman mamuk, nia husu ba nia atu hakbesik. No nia tau Jesus iha nia liman. Bibi-atan, simu nia, nia konsiente katak nia simu ona buat ne ebé nia la merese atu hetan, katak nia kaer iha nia liman prezente boot liu iha istória. Nia hateke ba liman sira-ne’e, ne’ebé sempre mamuk ba nia, agora sai hanesan Maromak nia berço. Nia sente hadomi no hahú hatudu Jezús ba ema seluk, tanba nia labele rai prezente sira ba nia an rasik.
Maromak nia grasa mosu hodi halo nabilan ita nia moris. Ita hetan bolu atu simu ida-ne’e no husik naroman Natál nian nabilan iha ita-nia laran, Natál ida-ne’e!
Ha’u entrega ba imi hotu nia orasaun, ita-nia irmán sira no komunidade edukativa sira ne’ebé moris iha situasaun terus no susar nian, liuliu iha rai sira ne’ebé funu la para, pobreza hakilar, no laih direitu no labele koalia.
Nai Maromak nia grasa mosu mos ba ema hotu-hotu no ba sira mos.
Ho sentimentu sira-ne’e, ha’u dezeja ba imi Natál ida ne’ebé hakmatek no santu, iha ksolok atu kontempla mistériu boot ida-ne’e no iha agradesimentu ba Aman ba ninia mizerikórdia rohan-laek ba mundu ida ne’ebé deseja tebes esperansa no sente katak dame laiha ona.
Ksolok natal!
Roma, 24 Dezembru 2025
Madre Chiara Cazzuola
Superióra Jerál Institutu FMA nian
klik iha link asesu mensajen Video ho lian Italiano
