Dili – Tuir programa Ámbitu Komunikasaun Sosiál nian, iha enkontru ba ekipa ho objetivu treinamentu kona-ba “video storytelling”. Treinamentu ne’e fasilita husi Señor Francisco Ismenio do Rosário Pereira, ne’ebé iha ninia empreza rasik kona-ba video production, naran NH Film. Enkontru formativu dahuluk ne’e hala’o loron 27 Fevereiru iha Uma Provinsiál FMA, Dili.
Partisipante sira ba training ne’e mak Ir Jacinta Gusmão, Ir Ines Bartolo, Ir Alice Filipe, Ir Noemia de Deus, Ir Ivonia Carmelinda, Ir Cesarina Correia no mestre Isaac Gusmão.
Iha ninia aprezentasaun, Sr Francisco Ismenio hato’o saida mak “Video Documentary Storytelling” , katak, “ema konta istória atu hanorin fiar no valor ba ema seluk”, halo “Transferénsia no troka matenek” hodi “uza Audiovizuál hanesan Kanál”. Tan ne’e, ita konta istória hodi kombina imajen, audio no vídeo. Iha enkontru ne’e, foka liuliu kona-ba dokumentáriu, tan ne’e tenke bazeia ba realidade, faktu istóriku…
Hafoin, atu halo serbisu, presiza planu atividade liuhusi etapa tolu: pré-produsaun, produsaun no pós-produsaun. Pré-produsaun envolve planeamentu, define 
tópiku, define audiénsia, define fonte sira, identifika ekipamentu, prepara storyline, halo oráriu, prepara storyboard, nst. Produsaun mak etapa realizasaun ka serbisu atuál halo filme, entrevista no gravasaun lian hahú. Pós-produsaun mak etapa ikus, prosesu editing video no audio, color grading, mixing audio, exporting, no uploading ba social media ka tau iha TV.
Depoizde parte input nian, ami mós halo prátika atu halo video dokumentáriu hodi uza programa simples ho smartphone. Ami foin mak hahú, maibé gruppu kontente no entuziasta atu kontinua ninia formasaun iha etapa tuirmai, enkuantu kontinua halo ezersísiu iha komunidade ida-idak.
Obrigada ba Señor Francisco Ismenio nia disponibilidade no laran-luak atu fahe ninia matenek no tempu. Atu Na’i rekompensa ita ho abundánsia.
(Komsos FMA- TIN)
