Dili/Balide, 30 Marsu – 3 Abril 2020, Maromak nia planu oin seluk duni, maske ho tempu ne’ebé urjente no badak de’it maibé Me. Assunta konsege duni hala’o ninia vizita kanónika iha komunidade Balide. Ami mós la husik leet de’it tempu ida ne’e, hodi husik ami an atu Maromak guia no haburas liu tan ami nia espirito familia nian.
Iha madre nia visita, Madre fo tempu tomak hodi simu madre ida idak iha colloqui, konferensia ba madre no postulante sira. Ho Postulante sira, madre dehan atu sira fó sira nia an no tempu atu buka, koñese, deskobre sira an no sira nia motivasaun. Sira mos fahe sira nia esperiénsia no madre fo korajen ba sira atu ba oin nafatin ho ksolok.
Iha loron ikus nian, ami dedika misa agradesimentu nian ne’ebé prezide husi amu Pároko Balide, Pe. Graciano Santos Barros. Iha loron hanesan madre fo tempu hodi gia irmán sira ba dixernimentu Provinsiál foun nian. Loron tomak irmán sira dedika an ba reflesaun, fahe no orasaun. Ikus mai halo konsultasaun iha kapela iha klima orasaun nian.
Momentu divertimentu nian, iha atraksi husi irmán no postulante sira. Iha Boa Noite, Me. Assunta hato’o mensajen Madre Jerál nia audiénsia ho Papa Francisco, iha ne’ebé Santu Padre agradese ba FMA sira nia prezensa iha Patagonia. No nia husu atu FMA sira fo nafatin importánsia ba formasaun no katekeze iha moris no misaun.
Obrigada barak ba Madre nia prezensa inan nian, ne’ebé akompaña no gia ami iha la’o dalan moris salesiana nian ida ne’e, atu to’o ba dalan santidade nian.
GRAZIE … OBRIGADA … THANK YOU …
(Komunidade FMA Balide)
