ℙ𝔸ℙ𝔸 𝕃𝔼Ã𝕆 𝕏𝕀𝕍: “𝕂𝕣𝕚𝕥é𝕣𝕚𝕦 𝕖𝕘𝕠í𝕫𝕞𝕦 𝕟𝕚𝕒𝕟, 𝕙𝕒𝕟𝕠𝕚𝕟 𝕕𝕖’𝕚𝕥 𝕚𝕥𝕒-𝕟𝕚𝕒 𝕒𝕟 𝕣𝕒𝕤𝕚𝕜; 𝕚𝕫𝕠𝕝𝕒 𝕚𝕥𝕒 𝕙𝕠𝕤𝕚 𝕖𝕞𝕒 𝕤𝕖𝕝𝕦𝕜 𝕟𝕠 𝕙𝕒𝕕𝕒’𝕖𝕥 𝕧𝕖𝕟𝕖𝕟𝕦 𝕜𝕠𝕞𝕡𝕖𝕥𝕚𝕤𝕒𝕦𝕟 𝕟𝕚𝕒𝕟 𝕟𝕖’𝕖𝕓é 𝕕𝕒𝕝𝕒 𝕓𝕒𝕣𝕒𝕜 𝕙𝕒𝕞𝕠𝕤𝕦 𝕜𝕠𝕟𝕗𝕝𝕚𝕥𝕦.”

Maun alin doben sira, ksolok domingo!

Ai-knanoik ne’ebé ohin ita sei rona husi Evanjellu (Lc 16,1-13) halo ita reflete kona-ba uza sasán sira no, jeralmente liu, kona-ba oinsá ita jere rikusoin folin-boot liu hotu: ita-nia moris rasik.

Iha istória, ita haree administradór ida ne’ebé nia na’in bolu atu “fó konta.” Imajen ida-ne’e komunika buat importante ida: ita la’ós na’in ba ita-nia moris ka ba sasán sira ne’ebé ita goza; buat hotu Na’i fó ona mai ita nu’udar prezente ida, no Nia entrega eransa ida-ne’e ba ita-atu kura, ita-nia liberdade, no ita-nia responsabilidade. Loron ida ita sei hetan bolu atu fó konta ba oinsá ita jere ita-nia an, ita-nia sasán sira, no rikusoin sira rai nian, iha Maromak nia oin no iha ema seluk nia oin, sosiedade, no liuliu, sira ne’ebé mai tuir ita.

Administradór iha ai-knanoik neʼe buka deʼit ninia lukru rasik, no kuandu toʼo loron neʼebé nia tenke fó konta no hasai tiha ninia knaar nuʼudar administrasaun husi nia, nia tenke hanoin kona-ba saida mak nia tenke halo ba ninia futuru. Iha situasaun difisil ida-ne’e, nia realiza katak akumulasaun sasán materiál sira la’ós buat ne’ebé importante liu, tanba rikusoin sira mundu ida-ne’e nian sei lakon. Entaun nia mai ho ideia brillante ida: nia bolu nia deve nain sira no “tesi” sira nia dívida, nune’e renunsia ba parte ne’ebé sei sai ninian. Hodi halo nuneʼe, ​​nia lakon ninia rikusoin maibé hetan belun, neʼebé sei prontu atu ajuda no apoia nia.

Hodi foti inspirasaun husi istória, Jezús ezorta mai ita: «Imi halo belun ho rikusoin ne’ebé la onestu,  tanba bainhira nia lakon, sira simu imi iha uma rohan-laek sira» (v. 9).

Loos duni, administradór iha ai-knanoik, maski bainhira jere rikusoin la onestu mundu ida-ne’e nian, konsege hetan dalan ida atu halo belun sira, mosu hosi ninia solidaun, egoízmu rasik. Liuliu ita, ne’ebé maka dixípulu sira no moris iha Evanjellu nia naroman, tenke uza sasán sira mundu nian no ita-nia moris rasik ho rikusoin loloos iha ita-nia hanoin, ne’ebé maka amizade ho Na’i no ho ita-nia maun-alin sira.

Belun doben sira, ai-knanoik konvida ita atu husu ba ita-nia an rasik: oinsá ita jere sasán materiál sira, rai nia rikusoin sira, no ita-nia moris rasik ne’ebé Maromak entrega mai ita? Ita bele tuir kritériu egoízmu, tau uluk rikusoin no hanoin de’it ita-nia an rasik; maibé ida-ne’e izola ita hosi ema seluk no hada’et venenu kompetisaun nian ne’ebé dala barak hamosu konflitu. Ka ita bele rekoñese buat hotu ne’ebé ita iha nu’udar prezente ida husi Maromak atu tau matan, no uza ida-ne’e nu’udar instrumentu ida atu fahe, atu kria rede sira amizade no solidariedade nian, atu haburas di’ak, atu harii mundu ida ne’ebé justu liu, ekuitativu liu, no fraternu liu.

Mai ita harohan ba Virjen Santíssima, atu nia bele intersede mai ita no tulun ita atu tau matan didi’ak ba buat ne’ebé Na’i entrega mai ita, ho justisa no responsabilidade.

 

Fonte: Vatican.Va