Sidade Vaticano – Amu-Papa iha ninia audiénsia jerál loron Domingu II Kuarezma nian halo reflesaun kona-ba eventu Transfigurasaun ne’ebé leitura sira propoin. “Evanjelista Lucas insiste kona-ba faktu katak Jezús transfigura «bainhira harohan» (v. 29). Nia tama iha kolókiu íntimu ida ho Aman”, iha-ne’ebé nalian mós Lei no Profeta sira – Moisés no Elias – atu Nia realiza, nu’udar Aman ia vontade, maski implika terus, krús. Iha orasaun ida-ne’e mak Jezús nakfilak an no nia glória naksira.
Nune’e, Amu-Papa hateten katak “orasaun iha Kristu no iha Espíritu Santu transforma ema husi laran no bele leno ema seluk no mundu hale’u nia”. Iha ita-nia esperiénsia mós ita hasoru ema sira ne’ebé leno, ne’ebé sira-nia matan hatudu roman, roman nabilan mai husi enkontru íntimu ho Maromak! Sira harohan no ne’e rezultadu harohan nian.
Amu-Papa husu atu “Iha Kuarezma ida ne’e, ita mós sa’e ba foho ho Jezús! Oinsá? Ho orasaun. Orasaun silensioza, orasaun fuan nian, orasaun ne’ebé buka nafatin Na’i. Ita horik minutu ruma iha rekollimentu, uitoan loroloron, ita-nia matan interiór fihir metin iha Ninia oin no husik NInia roman hakonu ita no leno ita-nia moris”.
Aleinde tema orasaun, Papa Francisco molok hateten katak “Kristu nia Transfigurasaun hatudu mai ita perspetiva sarani terus nian: terus mak pasajen tranzitória no nesesária. Pontu to’o nian ne’ebé ita simu bolun mak glória hanesan hatudu iha Kristu nia oin ne’ebé nakfilak”.
Papa Francisco mós hanoin no konvida sarani sira atu harohan ba situasan terus funu no konflitu sira ne’ebé kona umanidade, liuliu iha loron hirak ne’e aumenta tan ho atentadu kontra meskita rua iha Christchurch, Nova Zelándia. in Nuova Zelanda “Ha’u hafoun konvite atu sai ida de’it ho orasaun no jestu sira pás nian atu kombate ódiu no violénsia”.
