Dili, 27 Maiu 2023
JG
Iha tinan ne’e ita selebra aniversáriu daualuk publikasaun ensíklika Laudato Si’ nian kona-ba kuidadu ba kriasaun. Ne’e duni mak ita iha tempu hanaran “Semana Laudato Si’” husi loron 21-28 Maiu atu foti asaun konkreta hodi fó “Esperansa ba mundu no esperansa ba umanidade”. Ne’e mmak tema Semana Laudato Si’ nian ba tinan 2023.
Papa Francisco, iha Regina Caeli iha Domingu 21 Maiu 2023 hateten: “Ohin iha hahú Semana Laudato si’. Ha’u agradese Dikastériu ba Promosaun Integrál Dezenvolvimentu Umanu no organizasaun barak ne’ebé partisipa. No ha’u konvida ema hotu atu kolabora iha kuidadu ba ita-nia uma komún. Iha nesesidade boot atu tau hamutuk ita-nia kapasidade sira no kriatividade hamutuk!”.
Komunidade FMA Eusebia Palomino ne’ebé iha obra “Escola Ensino Básico” iha tinan ne’e halo ninia asaun konkreta oioin atu tau matan ba kriasaun, uluknanai hodi kria ambiente moos, hamenus uzu plástiku nian no tau matan ba malu.
Atu selebra aniversáriu Laudato Si’ ba dala ualu, iha loron sábadu 27 Maiu 2023, estudante sira uluknanai halo orasaun Laudato Si’ nian. Iha orasaun laran iha mós ezame konxiénsia nian kona-ba oinsá moris empeñu sira ne’ebé komunidade edukativa deside atu hala’o.
Depozde orasaun, iha limpeza jerál iha ambiente eskola laran no ninia sorin-sorin, estudante no manorin sira hamutuk hodi fó mós sasin ba ema sira katak, tau matan ba ambiente ba ita ida-idak nia responsabilidade, katak tenke hahú husi an rasik.
