ANS – Roma – Bainhira hatene tiha katak Amu- Papa Bento XVI fó sai ninia renúnsia ba ministériu Bispu Roma nian no Susesór S. Pedro nian, Reitor-Mor Salezianu sira nian hakarak hato’o mensajen ida ba Família Saleziana tomak.
Maun-alin doben sira, irmán sira, Membru hotu Família Saleziana nian, Don Bosco nia belun sira:
Ha’u kumprimenta imi ho Don Bosco nia fuan, husi México,iha-ne’ebé ha’u mai atu selebra Jubileu Osan-mean Inspetoria saleziana Guadalajara nian, ha’u-nia Inspetoria orijen nian.
Maski hakfodak tebes ba notísia ne’ebé simu kona-ba desizaun Santo Padre, Bento XVI nian, atu aprezenta ninia renúnsia atu kontinua gia ‘Pedro nia roo’ no iha konfirmasaun nia maun-alin sira iha fiar liuhusi Evanjellu, ninia sasin moris nian, ninia terus no ninia orasaun – ita simu edifikasaun husi ninia jestu ezemplár no profétiku.
Hodi aprezenta ninia demisaun, ho motivu razaun idade no kolen, konsekuénsia husi ninia laran-manas atu akompaña Kreda iha períodu ida karakteriza ho mudansa sosiál kle’an no lais, ne’ebé liga ho fiar no vida sarani, no husu enerjia fízika no espirituál boot, Santo Padre konfesa katak nia foti atitude dixernimentu nian iha Maromak nia oin.
Ninia desizaun mak rezultadu husi orasaun no sinál ezemplár obediénsia nian ba Maromak! Atitude ida hanesan ne’e hamosu iha ita admirasaun boot liután no estima. Ida-ne’e, sai dala ida tan karakterístika espirtiuál típika ninian: haraik-an, ne’ebé halo nia sai livre iha Maromak no ema sira nia oin, no hatudu momoos ninia sentidu responsabilidade.
Hanesan Don Bosco halo, hodi esprime ba Santo Padre ita-nia gratidaun tomak ba ninia laran-luak hodi serví Kreda no hatudu ninia paternidade ba ita-nia Família, ita akompaña nia iha nia faze moris nian ida-ne’e ho ita-nia domin boot no orasaun.
Hahú kedas husi oras-ne’e ita harohan ba Kreda, hodi invoka Espíritu Santu, atu Nia mak gia enserramentu pontifikadu ida ne’e nian, no gia konvokasaun no selebrasaun Konklave nian.
Ita saran ba Maria Imakulada Tulun-Na’in, iha memória Na’i-Feto Lurdes nian, Santo Padre no Kreda tomak. Atu Nia kontinua hatudu nia an, hanesan nia halo iha istória tomak, nu’udar Inan no Mestra.
Iha komuñaun fuan no orasaun nian,
P. Pascual Chávez Villanueva SDB
Reitór-Mor
