Sidade Vaticano – Tema katekeze Papa Francisco nian ba kuarta 9 Maiu mak rejenerasaun husi Batizmu: “Batizmu loke mai ita moris ida resureisaun nian, la’ós moris mundana ida. Fonte batizmál mak lokál ida iha-ne’ebé halo Páskua ho Kristu!”, Papa Francisco hateten. Ema foun nia renaximentu ezije atu redús uitoan ba rai-rahun kriatura taun. Imajen sira rate no inan nia knotak atu hatudu fonte batizmál bele espresa jestu simples sira batizmu ninia grandeza.
Igreja mak inan, liuhusi batizmu. Ita-nia ina-aman sira hahoris ita ba vida rai nian, Igreja hahoris ita ba vida rohan-laek Batizmu nian. Ita sai oan sira iha Oan-Mane Jezús.
Mai ita-ida-idak mós, ne’ebé moris hikas husi bee no Espíritu Santu, Aman lalehan halo atu ita rona ninia lian: «Ó mak ha’u nia oan ne’ebé ha’u hadomi liu». Lian aman nian ida-ne’e la’ós tilun mak rona, maibé fuan, ema fiar-na’in nia fuan; no akompaña ita ba moris tomak.
Batizmu ne’e labele halakon. Moris hikas husi Maromak, ita sai Maromak nia oan ba nafatin, no Maromak sei la abandona ita. Batizmu la repete ida, tanba nia imprimi iha ita marka espirituál ne’ebé labele halakon. Salan ida mós labele apaga nia, maski salan impede Batizmu atu prodús fuan sira salvasaun nian. Ema ida bele sai gerilleiru mós, Amu-Papa dehan, marka Batizmu nian la dezaparese. “Maromak nunka nega nia oan sira”! Amu-Papa repete.
Liuhusi Espíritu Santu nia asaun, Batizmu purifika, santifika, justifika, atu forma iha Kristu isin ida de’it. Ida-ne’e mak liafuan espresa durante kose mina krismál iha ulun: «Ha’u kose ó ho krisma salvasaun nian atu ó. Halibur ho ninia povu, horik ba nafatin nu’udar Kristu amlulik, profeta no liurai nia membru».
Nune’e Papa Francisco remata hodi husu atu sai ida de’it ho Kristu: “Maun no biin-alin sira, vokasaun sarani mak ida-ne’e: moris sai ida de’it ho Kristu iha Santa Igreja, hodi partisipa iha unsaun hanesan atu realuza misaun hanesan, hodi prodús fuan sira ne’ebé dura ba nafatin. Ida-ne’e signifika halo moris sai karan ne’ebé haksolok Maromak, fó testemuñu ba Nia ho moris ida fiar no karidade nian no oferese moris atu servíe ma seluk, turi Na’i Jezús nia ezemplu”.
Iha ninia saudasaun, Papa Francisco husu katak iha fulan Maiu dedika ba Na’i-Feto, ita reza ho modu espesiál ba dame iha Síria no iha mundu tomak.
