Onesiana da Costa
Baucau, 15 Janeiru 2023
Baucau – Ohin loron 15/1/2023, Familia Salesiana iha Baucau, halo Lectio Divina orienta husi Ir. Ermelinda da Silva ne’ebé organiza hodi halibur familia boot Salesiana Baucau partisipa iha lectio ho di’ak. Esperiensia furak hodi reflete Retor Mor nia estreia ba tinan ida ne’e “sai fermentu ba umanidade tomak” iha relasaun ho Evanjellu Lc. 13:20-21 “aiknanoik fermentu nian”. Iha Lectio ne’e tulun tebes Familia Salesiana presiza sai fermentu iha massa paun umanidade nian no hatudu posivel atu moris hamutuk maibe ita simu bolun hodi kompleta malu resiproka nune’e bele sai sasin domin Maromak nian. Furak halo Lectio tuir nia etapa ne’ebé iha: Statio, Lectio, Meditatio, Oratio, Collatio no Discretio-Actio, nune’e orasaun Lectio iha diferente ho orasaun seluk tanba iha tempu atu reflete, diálogu ho Na’i, fahe esperiensia ba malu hafoin taka ho orasaun. Kada etapa sira halo nu’udar grupu boot no pessoal, iha mós grupu kiik hodi fahe reflesaun tuir pergunta ne’ebé iha bazeia ba esperiensia ne’ebé relasaun ho Lectio, hafoin ba aprezenta iha grupu bo’ot nu’udar konkluzaun: oinsa hatene rona, hadomi ambiente, sai fermentu di’ak hodi kolabora hamutuk iha uma laran no ema seluk, iha grupu asosiasaun sira liu husi atividade no serbisu sira, atu hasa’e massa umanidade nian liu husi ema hirak ne’ebé ita hasoru. Remata tiha Lectio kontinua ho misa ne’ebé preside husi pe. Agnelo iha nia omilia haktuir: moris iha familia ita hotu simu bolun atu sai santu, ne’e ita nia vokasaun hanesan João Baptista hatudu Jesus ba apostolu sira ”Maromak Nia bibi Oan mak ne’eba”. Nune’e DB mós hanorin dalan santidade nian ba ita; haksolok, halo piedade ho simplisidade no halo kna’ar kiik sira lor-loron nian sai extra-ordinario, tanba ita hotu iha obrigasaun no kna’ar atu sai sasin Kristu nian. Ikus remata ho han hamutuk hodi fahe domin, ksolok no hametin relasaun nu’udar bin-alin iha familia.
