“Filme ne’e sei tulun ita kapta Maria Domenica nia mensajen, ne’ebé husik nu’udar liman-rohan ba nia oan-feto sira, espíritu Mornese nian, katak modalidade ida atu moris karizma salezianu. Maria Domenica nia moris karateriza ho santidade ida ho oin loron baibain nian moris iha sinál simplisidade nian, iha amizade loos, iha paixaun edukativa” (La Madre durante aprezentasaun filme nian, Roma- 4 Maiu 2012).
Multidea film – Filme “Maìn e la casa della felicitá” (lia-tetun: Maìn no uma ksolok nian) haktuir istória kofundadora nian, hamutuk ho Don Bosco, Institutu Figlie di Maria Ausiliatrice, ne’ebé Pio XII kanoniza iha tinan 1951. Filme ne’e halo hodi hanoin ba okaziaun aniversáriu da-140 fundasaun Institutu nian ne’ebé ohin-loron marka prezensa iha nasaun 94 iha kontinente 5 ho irmán liu rihun sanulu-resin-tolu no novísia liu atus rua limanulu.
Filme ida-ne’e realiza tuir regra hotu sinematografia nian, ne’ebé buka location justu ba ambientasaun típiku tempu nian, ho hatais, objetu, sasán, materiál, dekorasaun époka nian, nune’e hatur nia an iha tradisaun filme ho hatais/kostume tempu nian.
Elementu báziku tolu ne’e’ebé sai fundamentu ba filme ida-ne’e maka diresaun ho matenek husi SIMONE SPADA, fotografia furak ALESSANDRO PESCI nian, no roteiru/screenplay – husi família – FMA ida, irmán Caterina Cangià.
Filme ne’e halibur elementu istóriku lubuk-ida husi Santa Maria Domenica Mazzarello nia biografia, husi atu sira prosesu beatifikasaun nian no husi Cronistoria Institutu nian, nune’e mós Surat sira Santa ne’e nian, elementu hotu, sitasaun no reflesaun hotu ne’ebé foin-sa’e sira no ema sira ohin-loron nian bele lee no komprende.
Loos duni, tanba filme ne’e hakarak ko’alia ba ema hotu nia fuan, ba Família Saleziana nia fuan. Nia hakarak hateten katak santidade mak buat ida posivel, buat ida loroloron nian, ne’ebé ita bele moris no halo sai nabilan iha ita nia sori-sorin hodi la’o tuir indikasaun karizma nian.
Filme ne’e konta Maìn nia infánsia tanba dirije mós ba labrik sira. Ba sira, nia hakarak halo komprende katak ema la moris mai santu ona, maibé halo dalan atu sai santu hodi hatán ba Maromak nia grasa, hodi rona ema sira ne’ebé Nia tau iha ita-nia sorin no hodi ko’alia, liuliu ho Maromk, ho orasaun, iha simplisidade fuan no moris nian.
Filme ne’e fó importánsia boot ba família, tanba iha família maka ema haktolan/absorve domin ba vida no valór sira. Iha filme hatudu momoos armonia entre Maria no nia Aman, liuhusi fotografia nabilan iha-ne’ebé Aman no Oan-feto hateke malu, hafoin Aman ne’e konvida nia oan atu hateke ba Jezús (kuadru primeira komuñaun nian iha Parókia Mornese nian).
Filme taka ho panorámika lais elementu gráfiku no fotografia sira ne’ebé narra Institutu FMA nia espansaun iha mundu. Nasaun sira no tinan sira fundasaun nian kahur no hatudu tuir malu liuhusi fotografia époka nian, ne’ebé, neineik-neineik sai fotografia atualidade nian. No buat ne’e hotu akompaña ho múzika furak husi maestro no kompozitór ROBERTO GORI.
Xave leitura filme nian maka liafuan tolu maibé mós empeñu moris nian: DOMIN – RELASAUN – PAIXAUN EDUKATIVA.
Domin ba Jezús, ba família rasik, ba belun sira, ba natureza, karakteriza Maìn labarik no Maìn foin-sa’e no adulta. Buat hotu halo tanba domin, buat hotu moris iha domin. Bele rona ko’alia nafatin kona-ba domin no liuliu haree oinsá moris iha domin.
Relasaun sira harii ho diálogu, komprensaun, atensaun domin nian ba ema seluk, ba ida-ne’ebé ki’ik. Nune’e ita haree Maìn ne’ebé tulun inan ida be moras, ne’ebé hamaus inan ne’e nia oan sira, ho modu konkretu tau matan ba sira hodi lori buat ruma atu sira han no lori roupa foer sira atu fase. Nia moris relasaun sira iha simplisidade, ne’e maka kontestu loroloron iha-ne’ebé harii formasaun no edukasaun, liuliu, rezultadu husi relasaun boot no festa nian: relasaun ho Jezús. Maìn promete ba Nia atu la liu minutu 15 la hodi hanoin Nia.
Paixaun edukativa hatudu hodi tau “oan-feto” sira nafatin iha nia oin, halo buat hotu ba sira, atu sira aprende serbisu/okupasaun ida, atu sira la monu iha perigu laran, atu sira bele diverte, hananu no dansa. Atu sira sai boot hamutuk ho Na’i-Feto, Inan ne’ebé hakarak sira nia di’ak liu buat seluk.
Iha filme Maìn supera difikuldade sira, hanesan haktuir mós iha biografia. Nia manán moras tifu no imposibilidade atu serbisu hanesan uluk, supera prova ezíliu nian iha Valponasca ne’ebé bandu nia atu hasoru labarik sira, tanba ema sira aldeia nia inkomprensaun no laran-moras, nia supera kolen no terus sira. No buat ne’e hotu tanba hadomi menina sira.
