Iha loron 29 Maiu 2026, sai nu’udar loron istóriku ida ba komunidade Cailaco. Eskola Bázika Katólika Filial (EBCF) São Domingos Sávio ohin ofisialmente inaugura ona nia infraestrutura foun, ne’ebé kompostu husi aula haat (4) no sala profesór ida. Serimónia ne’e sai nu’udar prova ida katak ho kolaborasaun, ita bele hadi’a kualidade edukasaun ba ita-nia jerasaun foun.
Iha serimónia ne’e, reprezentante Governu husi Gabinete Koordenador do Gabinete de Apoio à Sociedade Civil (GASC), Sr. Joaquim da Costa Freitas, hamutuk ho Fundasaun Maliana, fó ona fiar ba projetu ne’e. Iha ninia lia-menon, Sr. Joaquim subliña katak edukasaun la’ós de’it konstrusaun fíziku, maibé inklui mós ekipamentu didátiku sira hanesan kadeira, meza, no livru sira ne’ebé presiza tebes atu labarik sira bele aprende ho dignidade. Nia hato’o katak parseiria entre Governu no sosiedade sivíl sei kontinua sai xave ba dezenvolvimentu nasaun nian.
Fatin aprendizajen foun ne’e mós hetan bensaun husi Diakon Xisto Corte-Real, hodi hamosu esperansa katak fatin ne’e sei sai fatin ba formasaun kualifikadu. Koordenadora EBCF Cailaco, Irmã Ana Manuela da Costa, ho laran-tomak agradese ba Governu, ba parseiru sira, no ba traballadór sira ne’ebé ho sakrifísiu boot konsege remata serbisu ne’e. Irmã Ana fó hanoin ba inan-aman no komunidade tomak katak, susesu ne’e presiza kontinuidade; presiza disiplina no sakrifísiu husi ita hotu atu labarik sira bele hetan futuru ne’ebé di’ak liu.
Nu’udar deviza ne’ebé sai hanesan inspirasaun ba ita hotu: “Buat ne’ebé mak ita halo ohin, sei determina ita-nia aban-bainrua.”
Investimentu ne’e la’ós de’it sasán, maibé nu’udar patrimóniu folin-boot ba futuru Cailaco. Ho nune’e, ami husu ba estudante sira atu tau matan didi’ak ba fasilidade sira-ne’e, no ba inan-aman sira atu kontinua fó apoiu, tanba edukasaun mak ita hotu nia knaar no responsabilidade komún.
Obrigada ba kontribuisaun husi parte hotu-hotu ne’ebé hamutuk ona hodi halo buat ne’e sai realidade.
Sr. Ines B.Freitas,FMA
