Dili (Timor-Leste). Asosiasaun “Antigas Alunas Salesianas” Figlie di Maria Ausiliatrice (FMA) nian mak asosiasaun leigu sira-nian lahó eskopu lukru nian,grupu ida pertense ba Família Saleziana. Sira ida-idak nu’udar antiga aluna iha empeñu atu haburas sira nia an nu’udar ema, tuir espíritu salezianu iha sira-nia família laran, iha ambiente serbisu no estudu nian, iha mundu polítiku no sosiál.
Iha Timor-Leste foin iha Uniaun tolu antiga aluna sira-nian: Fuiloro, Vemilale no Dili. Uniaun tolu ne’e ohin loron, 30 Juñu 2012, halibur hamutuk iha kongresu loron tomak iha Centro de Formação João Paulo II, hamutuk partisipante 71 ho objetivu atu “hametin Uniaun Antiga Aluna sira iha Timor-Leste”.
Tema sira hakle’an durante koongresu maka hanesan tuirmai ne’e:
- Espiritu Mornese ( Ir. Gianna, fma)
- Identidade Família Saleziana nian ( Pe. Mario do R., SDB )
- Transmite esperiénsia edukativu ( Sr. Acacio Guterres, AA Salezianu )
- Identidade Antiga/ Antigu Aluna/u sira-nian ( Ir. Cecilia, fma)
Tema sira-ne’e tulun atu antiga aluna sira bele hakle’an no moris tuir espiritualidade saleziana hodi sai masin no naroman iha fatin sira hela bá. Oradórs sira subliña katak, atu sai membru ba assosiasaun ida, preszisa iha vontade no sente karizma ida ne’ebé dudu ka book, atu hola parte ho forma ativa iha atividade ne’ebé determina hamutuk. Bele iha servisu barak, maibé bainhira iha hakaran no domin boot ba karizma, tempu iha ba hotu.
Visaun espesífiku ba Antiga Aluna nian maka: Transforma sira-nia moris sai sarani diak no sidadaun ne’ebé onestu/a.
Antiga Aluna sira mós halo diskusaun iha grupu no planu ba tinan tomak nian hanesan:
- Peregrinasaun nasionál ne’ebé sei hala’o iha fulan Setembru, dia 15-16, ba Soibaba hodi hanoin ba FMA nia prezensa ba tinan 25 iha Timor-Leste.
- Hamoris fila fali grupu sira uniaun nian.
- Hametin estrutura iha uniaun nia laran.
Iha kongresu ne’e sira mós loke inskrisaun atu renova fali sira-nia afiliasaun ba asosiasaun hodi konsolida uniaun.
Ikus liu sira halo kompromisu ida iha orasaun hodi promete katak ho liberdade atu hola parte iha assosiasaun hodi hametin uniaun no prontu atu simu no aseita Estatutu hodi kompromete an atu respeita no estuda regulamentu sira.
