Maun no biin-alin sira, bondia!
Iha domingu dahuluk Kuarezma nian, Evanjellu fó hanoin tema sira tenasaun nian, konversaun nian no Liafoun Di’ak nian. Evanjelista Marcos hakerek: «Espíritu dudu Jezús ba rai-fuik maran no iha rai-fuik maran nia horik loron haatnulu, iha-ne’ebé Satanás babeur nian» (Mc 1,12-13). Jezús bá iha dezertu atu prepara An ba ninia misaun iha mundu. Nia la presiza konversaun, maibé, nu’udar ema, nia tenke liu husi prova ne’e, ba Nia An rasik, atu obedese Aman nia vontade, nune’e mós mai ita, atu haraik mai ita grasa atu manán tentasaun sira. Preparasaun ne’e konsiste iha kombatimentu kontra espíritu aat nian, katak kontra diabu. Mai ita mós, Kuarezma mak tempu ida “agonizmu” espirituál nian, luta espirituál: ita simu bolun atu enfrenta Malignu ho orasaun atu iha kbiit, ho Maromak nia tulun, manán nia iha ita-nia moris loroloron nian. Ita hatene, buat aat infelizmente serbisu iha ita-nia ezisténsia no haleu ita, iha-ne’ebé manifesta violénsia sira, hakribi ema seluk, taka an, funu sira, injustisa sira. Buat sira-ne’e hotu mak Malignu nia serbisu, buat aat nian.
Depoizde tentasaun iha dezertu, Jezús hahú kedas haklaken Evanjellu, katak Liafoun-Di’ak, ne’e mak liafuan daruak. Liafuan dahuluk mak “tentasaun”; daruak “Liafoun Di’ak”. No Liafoun Di’ak ne’e ezije konversaun husi ema – liafuan datoluk – no fiar. Nia haklaken: «Tempu to’o ona no Maromak nia Reinu besik ona»; hafoin hato’o ezortasaun: «Konverte an bá no fiar iha Evanjellu» (v.15), fiar ba Liafoun Di’ak katak Maromak nia Reinu besik ona. Iha ita-nia moris ita presiza nafatin konversaun – loroloron! -, no Igreja halo ita harohan ba buat ne’e. Defaktu, ita la orienta an ho modu sufiseinte ba Maromak no ita tenke kontinua diriji ita-nia neon no ita-nia fuan ba Nia. Atu halo ida-ne’e presiza iha korajen atu hewai buat hotu ne’ebé lori ita sai husi dalan, valór falsu sira ne’ebé lohi ita hodi dada ho modu haksumik ita-nia egoízmu.Iha kontráriu, ita tenke konfia iha Nai, iha Ninia laran-di’ak no Ninia projetu domin nian mai ita ida-idak. Kuarezma mak tempu peniténsia nian, loos duni, maibé la’ós tempu triste ida! Tempu ida peniténsia nian, maibé la’ós tempu triste ida, lutu nian. Empeñu ksolok nian no sériu atu lolu ita husi ita-nia egoízmu, ita-nia ema tuan, no hafoun an tuir grasa ita-nia Batizmu nian.
Maromak de’it mak bele haraik mai ita ksolok loloos: inutil lakon ita-nia tempu atu buka iha fatin seluk, iha rikusoin sira, iha prazér sira, iha podér, iha karreira… Maromak nia Reinu mak realizasaun ita-nia aspirasaun sira hotu, tanba nia mak, tempu hanesan, ema nia salvasaun no Maromak nia glória. Iha domingu dahuluk Kuarezma nian ne’e, ita simu konvite atu rona ho atensaun no hakohak Jezús nia apelu ida-ne’e atu konverte an no fiar iha Evanjellu. Ita hetan ezortasaun atu hahú ho empeñu dalan ba Páskua, atu simu nafatin Maromak nia grasaun, ne’ebé hakarak transforma mundu iha reinu ida justisa nian, dame nian, fraternidade nian.
Maria Santíssima tulun ita atu moris Kuarezma ida-ne’e ho fidelidade ba Maromak nia Liafuan no ho orasaun ne’ebé la para, hanesan Jezús halo iha dezertu. La’ós imposivel! Ne’e katak hakohak domin ne’ebé mai husi Maromak ne’ebé mai no hakarak transforma ita-nia moris no mundu tomak.
