Iha loron 27, Abril 2026, Me. Assunta halo nia vizita kanonika iha komunidade Maria Auxiliadora Venilale. Iha dader kmanek ne’e Irmán sira, Kandidata sira no labarik Orfanatu sira forma ona iha odamatan bo’ot hodi simu Madre ho arku moris iha ida idak nia liman. Momentu furak nakonu ho moris no atetude maksimun nian. Iha loron hirak durante Madre nia vizita madre hasoru grupo oioin ne’ebé eziste iha Komunidade. Hasoru uluk FMA sira hafoin, iha kolokio, hasoru OPIAM, trabalhadores, Orfanatu sira, Kandidata sira no ikus ho komunidade edukativu sira.
Ba FMA sira Madre fo hanoin atu aprende husi Nain Feto no Madre Mazzarello ne’ebé hatene hare ba ema seluk nia presiza hodi envolve ema seluk iha moris lor-loron nian hatan ba nesesidade sira ne’e hanesan akontese iha Kaná no Mornese. Ba OPIAM sira Madre fo hanoin sira kona ba sira nia knar nu’udar OPIAM ne’ebé nafatin reza, halo karidade no fo sasin. Tamba nu’udar Misionaria ki’ik sira,tenke sai sasin Jesus nian ba ema hotu. Ba Trabalhadores sira Madre husu atu kolabora ho Madre sira hodi tau matan ba labarik sira. Ba Orfanatu sira Madre fo hanoin kona ba elementu 5 ne’ebe importante iha ita nia moris ne’ebé mai husi liman fuan lima. Liman inan mak besik liu fuan, mak reza, iha ita nia moris orasaun mak importante nafatin. Wainhira ita reza, ita reza ho fuan tomak. Liman hatudu, baibain ita uza atu hatudu ema ka sasan ruma. Hatudu laos atu julga ema seluk maibe hatudu ba ema hodi hanoin katak hau nunka mesak, iha ema barak ne’ebe hamutuk ho hau. Liman klaran mak a’as liu fali sira seluk. Virtude ne’e mak virtude onestu. Liman fuan ne’e fo hanoin ita atu onesto. Onesto katak sinseru iha Maromak nia oin no ema seluk nia oin. Nune’e se ema seluk laiha ita nafatin moris iha Maromak nia oin, ita nafatin onestu. Liman kadeli mak liman ne’ebe fraku. Liman fuan ne’e halo ita hanoin ema ne’ebe fraku presiza tulun. Nune’e ita haka’as an atu tulun ema sira ne’ebe presiza ita nia tulun. Liman ikus mak ida ne’ebe kiik liu. Ida ne’e fo hanoin mai ita katak ita mak kiik liu iha Maromak Nia oin. Nia fo hanoin mai ita katak maski ita kiik hanesan ne’e Maromak hadomi nafatin ita. Maromak kria ita idaidak ketak ketak la hanesan ema seluk. Hau kiik maibe hau mak unika, ida ne’e mak Maromak hakarak. Iha liman kadeli ema tau iha kadeli ho fatuk murak ne’ebe karu liu. Ita idaidak mak unika no folin bo’ot. Maromak hadomi liu. Idaidak nia moris mak folin bo’ot liu. Ba Kandidata sira Madre koalia kona ba karateristika FMA nian. Entre karateristika sira ne’ebé sira deskobre Me. Assunta haklean liu kona ba saran-an tomak no Sistema preventivu. Konsagrada Salesiana katak saran an tomak ba Maromak liu husi moris komunidade no moris misaun ne’ebé kreda rasik entrega mai ita. Moris konsagrada katak FMA sira idaidak moris hodi serbi deit ba Jesus hanesan kalis ne’ebé sagradu. Sistema preventivu mak karateristika importante ne’ebé labele falta iha moris salesiana. Sistema preventivu sai hanesan estilu partikular Salesiana sira nian ne’ebé halo kongregasaun FMA diferente ho kongregasaun sira seluk. Nu’udar Pre-Aspirante no asprirante buka deskobre Maromak nia hakarak iha imi nia moris lorloloron, lalika tauk bainhira hasoru difikuldade sira tamba difikuldade sira ne’e mak tulun imi atu sai tasak no sai forte hasoru realidade. Ba komunidade edukante Madre hudu atu moris tuir nafatin Sistema preventive tamba ita mak Dom Bosco nia oan sira ne’ebé moris tuir nafatin eransa ne’ebé nia husik hela. Tulun labarik sira ho element Tolu Sistema preventivu nian katak ho Razaun, Relijiaun no domin (amorevolezza).
Obrigada wain ba prezensa durante loron hirak nek ne’e iha ami le’et, liuliu ba liafuan murak sira ne’ebe fo hanoin fali mai ami atu halo diak liu tan misaun ne’ebé ami simu husi Maromak liu husi moris nu’udar familia salesiana.
Sr. Noemia, FMA
