Sidade Vaticano – Social media presiza fiar-na’in hotu ninia empeñu. Ne’e mak ezortasaun Bento XVI nian iha Mensajen ba Loron Mundiál Komunikasaun Sosiál da-47 ho tema «Rede sosiál sira: odamatan Lialoos no Fiar nian, espasu foun evanjelizasaun nian». Iha dokumentu ne’ebé publika ohin, Amu-Papa subliña katak presiza lori Evanjellu ba social network. Rede sosiál la’ós “mundu paralelu”, nia hakerek, no bele sai “instrumentu evanjelizasaun nian no fatór dezenvolvimentu umanu nian”.
Bento XVI salienta importánsia rede sosiál nian ba sarani sira. Nia dehan katak se espasu sira-ne’e hetan valorizasaun ho di’ak no ho ekilíbriu bele reforsa ligasaun sira unidade nian entre ema no promove armonia iha família umana. No nia husu atu ema sira ne’ebé partisipa iha social network “tenke haka’as an atu sai auténtika”. Basá iha espasu sira ne’e “ema komunika an rasik”. Tuir Bento XVI rede sosiál sira internet nian hamosu “forma foun” komunikasaun nian entre ema ne’ebé ezije “respeitu no kuidadu” ba privasidade no lialoos. “Kultura rede sosiál sira-nian no mudansa sira iha forma no estilu komunikasaun nian lori dezafiu seriu ba sira ne’ebé hakarak ko’alia kona-ba lialoos no valór sira”. Nune’e husu ba sarani hotu atu halo ema koñese Evanjellu iha “ambiente dijitál” mós. Nia afirma: “ambiente dijitál la’ós mundu paralelu ida ka virtuál de’it”, maibé nia “parte realidade loroloron ema barak nian. liuliu foin-sa’e sira-nian”. Defaktu, “espasu virtuál sira hanesan Facebook ka Twitter, ho konta nakloke tokon ba tokon, sai prasa nakloke ida iha ne’ebé ema fahe ideia sira, informasaun sira, opiniaun sira no kria relasaun foun no forma foun komunidade nian”.
Uza social network la’ós atu la’o tuir tempu, maibé atu bele halo atu Evanjellu “to’o ba ema barak nia neon no fuan”. Nia evidensia katak sarani sira-nia autentisidade iha rede sosiál hatudu liuhusi partilla kona ba bee-matan sira-nia esperansa no ksolok: fiar.
Nune’e sarani sira simu bolun atu lori ba social network roman fiar nian. Social network, Amu-Papa kontinua, “aleinde insrumentu evanjelizasaun nian, sira mós sai fatór dezenvolvimentu umanu nian”. Nia haree katak rede “fasilita partilla rekursu espirituál no litúrjiku sira” no, “loke mós ba dimensaun seluk fiar nian”. Defaktu, ema barak deskobre on line esperiénsia fiar nian, komunidade nian, peregrinasaun nian. Nune’e, hodi halo Evanjellu hela iha ambiente dijitál, sira bele konvida ema sira ba enkontru orasaun nian no selebrasaun iha fatin konkretu sira, hanesan iha kapela no uma-kreda sira. Amu-Papa taka nia mensajen ho ezortasaun ba fiar-na’in sira atu la bele monu iha inkoerénsia ka unidade espresaun nian no sai sasin ba Evanjellu iha realidade fízika no dijitál.
Mensajen ba Loron Mundiál Komunikasaun Sosiál tinan-tinan publika iha loron 24 Janeiru, festa S. Francisco de Sales, padroeiru jornalista sira-nian.
Loron Mundiál Komunikasaun Sosiál, ne’ebé iha tinan ne’e selebra iha loron 12 Maiu – domingu molok Pentekostes – Konsíliu Vaticano II mak estabelese liuhusi dekretu «Inter Mirifica», 1963 nian.
