Aleinde kondena, ida-ne’e fó sinál ba mudansa iha maneira ne’ebé maka Estadus Unidus afronta ba relasaun entre adolexente no rede sosiál sira. Juis ida hosi Nova Méxiku haruka ona Meta atu selu adisionál millaun $567 ba fundu ida ne’ebé destinadu atu hadi’a estragu saúde mentál nian ne’ebé nia plataforma mak nu’udar kauza ba foinsa’e sira ne’ebe utiliza. Osan ida-ne’e maka adisaun ba millaun $375 ne’ebé maka komisaun ida impoin iha fulan-Marsu, hodi lori totál ba millaun $942 iha Nova Méxiku de’it. Juis Bryan Biedscheid deside katak Mark Zuckerberg nia empreza, ne’ebé kontrola Facebook, Instagram, no WhatsApp, reprezenta “perigu públiku” ida: maski la’ós responsável úniku, nia hakerek, nia plataforma sira hanesan “fatór signifikativu ida iha krize saúde mentál atuál entre joven sira”.
Orijen hosi kazu ne’e maka prosesu ne’ebé hatama iha tinan 2023 hosi Advogadu Raúl Torrez hasoru Meta, akuzadu tanba espoin menór idade sira ba esplorasaun seksuál no prejudika sira nia saúde mentál ho software aditivu. Iha fulan-Marsu, komisaun ida hosi Santa Fe hetan katak empreza ne’e “konsientemente” halo aat labarik rihun resin no subar nia koñesimentu kona-ba esplorasaun seksuál iha nia plataforma sira, hodi viola Lei Prátika Komersiál Injustu estadu nian. Algoritmu sira dirije ba adultu sira ho konteúdu adolexente nian, enkuantu empreza subar nia peskiza internu rasik kona-ba risku sira hosi prátika sira-ne’e. “Kazu ida-ne’e sempre kona-ba proteje labarik sira,” Torrez komenta. “Ida-ne’e maka vitória ida ba inan-aman hotu-hotu ne’ebé maka preokupa ho saida maka media sosiál halo ba sira nia oan sira.” Meta anunsia ona apelu ida. “Ami servisu maka’as atu ema sira bele seguru,” nia hatán.
Tanba ne’e, desizaun ne’e la para iha osan, 3/4 hosi osan ne’e (dolar millaun 420) sei ba halo tratamentu saúde mentál, ho restu sei ba prevensaun no triajen durante tinan lima. Tribunál ezije ba Meta atu modifika nia produtu ba labarik sira ho tinan menus hosi 18 ne’ebé hela iha estadu: sei tenke subar númeru “like” tuir padraun, limita uzu kombinadu Facebook no Instagram nian ba oras 90 kada fulan (besik oras tolu kada loron) no suspende notifikasaun sira iha kalan no durante oras eskola nian. Nia mós tenke hadook labarik sira ho idade menus hosi 13 hosi nia aplikasaun sira, hadi’a nia ferramenta sira estimasaun idade nian ho intelijénsia artifisiál, hamoos dadus ne’ebé halibur iha labarik sira ho idade menus hosi 13, no relata kona-ba nia progresu kada fulan neen. Maibé, labele halo buat hotu-hotu. Juis rekoñese katak Lei privasidade labarik nian federal impede nia atu impoin verifikasaun idade ne’ebé halibur labarik sira nia dadus.
Kazu ne’e, maski nune’e, rekoñese esforsu sira hosi inan-aman atus resin ne’ebé durante tinan barak denunsia efeitu hosi aplikasaun sira ne’ebé enkoraja auto-prejudikasaun ka dezorden alimentár no atrai adultu ba labarik sira nia profilo. Pontu virajen ne’e mosu iha 2021 hosi revelasaun eis-funsionáriu Frances Haugen, ne’ebé hatudu katak Meta hatene kona-ba prejuízu ne’ebé Instagram halo ba adolexente sira. Prosesu Nova Méxiku nian mosu hosi investigasaun ida jornál The Guardian ne’ebé fó sai oinsá Facebook no Instagram sai hanesan merkadu ba tráfiku seksuál labarik nian. Prokuradór estadu nian liu haat-nulu kesar kedas empreza, ne’ebé rezulta iha Meta agora hasoru prosesu rihun ba rihun iha Estadus Unidus tomak hosi estadu sira seluk, distritu eskolár no família sira. Tanba ne’e, kazu ne’e risku atu sai kazu boot ida. Iha abertura julgamentu nian iha semana oin, California, Colorado, Kentucky, no Nova Jersey buka hela multa potensiál ho biliaun $1.4, kuaze valór merkadu asaun tomak empreza nian. Prosedimentu sira seluk hala’o hela iha Tennessee no Oakland. Iha fulan-Jullu, Uniaun Europeia mós haruka Meta atu halo nia plataforma sira sai “menus aditivu”. Maibé, multa sira la prejudika sira, ne’ebé maka hamosu lukru besik biliaun $60 iha 2025, maski ohin loron sai hanesan dalan úniku atu hapara.. Lei Seguransa Online Labarik nian, ne’ebé aprova hosi Senadu iha 2024, paradu iha Kámara, no lei verifikasaun idade estadu nian oioin hetan blokeiu hodi liberdade espresaun nia naran. Iha vákuu lejislativu, juis sira no prokuradór estadu nian sira agora tenta atu estabelese regra sira, kazu ida tuir kazu seluk. “Amérika sei la aprova lei ida ne’ebé bandu media sosiál,” Advogadu Torrez rezume. ”
Maibé se empreza sira hanesan Meta hatene katak sira hamosu prejuízu ho maneira ne’ebé sira dezeña sira nia produtu, estadu ikusmai hetan dalan ida atu hateten to’o ona.” Ida-ne’e maka kontráriu hosi dalan ne’ebé hili hosi Europa, ne’ebé hakarak idade mínimu armonizadu (Parlamentu Europeu indika ona 16) no ferramenta verifikasaun idade komún.
