Remixio, Aileu Timor-Leste 17-21 agostu 2026, Comisaun Nasional Juventude(CNJCTL) serbisu hamutuk ho parokia Remixio no COJUCAD hodi realiza Jornada Nasional Juventude tinan 2026. Husi tinan 1992 Ita hanaran Kruz Joven no hahu hanaran ba Jornada Nasional Juventude (JNJ) iha 2019. Tuir programa Kruz joven sei entrega fali ba parokia Vemasse iha dia 21 agosto.Foinsa’e barak mak partisipa iha eventu ida ne’e, foinsa’e sira ne’e mai husi diocese tolu: Foinsa’e Catolica Diocese Maliana (FOCADIMA), comisaun Juventude Catolica Arquidiocese Dili (COJUCAD), Comisaun Juventude Diocese Baucau (COJUDBA) ho Movimento Juventude Katolika sira nune’e Movimentu Juvenil Salesiano (MJS) partisipa hotu iha atividade refere, hamutuk ho foinsa’e representa husi Universidade sira ho Padre, Madre e Frater responsavel ba grupo sira. Partisipante hotu ba loron dahuluk total 1005 partisipante. Entre sira iha mos irman FMA, foinsa’e MJS no Fosca husi Parokia Salesiano sira, prezensa foinsa’e sira ne’e bele hatudu kedas Kreda ida sinodal ne’ebe lao hamutuk ho foinsa’e sira hotu.
Iha loron dahuluk akolhiensa nian, uma nain sira simu partisipante sira ho Dansa no bua malus nu’udar sinal simu bainaka tuir kultura Remixio nian.Hafoin kontinua kedas ba visita Kruz Joven no halo orasaun badak iha parokia laran, depois de han meudia, fahe foinsa’e sira ba hamutuk ho familia sira.
Iha lorokraik misa abertura jornada nasional iha Parokia kontinua ho cerimonia abertura ho diskursu Sira : uluk knanain husi Sr. Florindo Napoleão (Diretor Nacional MJDAC), ne’ebe iha nia mensajem fo korajen no motiva foinsa’e Sira atu sai foinsa’e ne’ebe bele fo influensia ba foinsa’e sira seluk. Tamba imi sorte no hili imi mai tuir aktividade Jornada Nasional Juventude iha ne’ebe hetan esperiensia barak integralmente, sai foinsa’e ho fiar ne’ebe hakmatek no aten brani hodi luta hetan matenek, abilidade hodi sai kompetensia ba knar tolu ne’ebe simu iha batismo sai Profeta, Liurai no Nailulik hodi fo sasin nu’udar ema diak iha sosiedade. Nia konvida foinsa’e Sira atu hader hodi aprende barak tan ninia diak imi sei sente depois de tinan ruma. Mensajem daruak Husi Amo Francisco Indra ne’ebe tulun foinsa’e sira atu hatene istoria Kruz Joven nian ho ninia sentidu lolos ne’ebe halibur foinsa’e sira iha eventu Jornada Nasional Juventude atu oferese ba foinsa’e sira oportunidade atu moris fraterna no halo enkontru pesoal ho Kristu mak nudar objetivu prinsipal husi JNJ no parte seluk fo apresiasaun no agradesimento ba Parokia uma nain ne’ebe serbisu ho diak tebes no halo peregrinu sira sente uma no seguru. Hafoin Amo Paroko Remixio pe. Feliciano Barreto konvida foinsa’e sira atu moris loron hirak ne’e hodi husik an atu hasoru malu ho Kristu hodi tama klean iha tema: “Hader ba”. Tema Ida nee konvida foinsa’e sira atu hamriik ho ate brani,keta dezanima maibe hateke ba Kristu Nia Kruz Santa sinal salvasaun nian. Sinal ksolok paskoa nia ba foinsa’e sira hodi hakat liu dezafiu no gosip sira ne’ebe halo foinsa’e sente triste no lakon esperansa. Hader espiritual hodi harohan, hametin fiar no amizade ho Kristu foinsa’e sira nia belun (Mt.2.13-18) no ho animasaun barulho ne’ebe anima tebes foinsa’e sira ho sarani Remixio.
Ir. FERNANDES Julia,FMA
