Obra “Figlie di Maria Ausiliatrice” (FMA) iha Timor
Irmán saleziana nain tolu tau ain iha Venilale iha loron 2 Outubru 1988. Fofoun komunidade sira depende ba Provínsia Filipinas nian. Iha Janeiru 1997 sai pre-provínsia hamutuk ho nasaun Vietnam, Kambodia no Myanmar. Ho prezensa nia espansaun no aumentu númeru irmán sira nian, iha 2003 sai pre-provínsia ketak, hafoin iha 5 Agostu 2009 sai provínsia TIN S. Maria Domenica Mazzarello ho uma 12 (inklui 2 iha Indonézia), irmán misionária nain 10, timorense nain 76, indoneziana nain 5. To’o data 31 Dezembru 2011 nian iha irmán perpétua na’in 60, temporária na’in 21 no novísia na’in 6.
FMA sira hetan konvite atu mai iha Timor husi salezianu sira atu tau matan ba grupu órfan sira-nian ne’ebé tun husi ai-laran iha ne’ebé populasaun barak halai ba subar husi tropa indonéisa sira. Molok ne’e mestre balun mak tau matan ba sira maibé mosu nesesidade atu halibur sira iha ambiente ida seguru no bele hetan asisténsia di’ak. Iha fulan Outubru 1988 FMA sira hahú sira-nia atividade iha sub-distritu Venilale. Hamutk ho orfanatu uma ne’esai mós uma formasaun nian tanba salezianu sira prepara tiha ona feto-raan balun ne’ebé ho irmán sira-nia xegada sira hahú kedas sira-nia formasaun, uluknanai ba tempu rumaiha Timór, hafoin haruka ba Filipinas ba sira-nia formasaun to’o profisaun. Iha tempu ne’ebá iha orfanatu hela labarik mane no mate besik 180, barak mak gerilleiru sira nia oan subar iha ai-laran. Irmán sira hala’o atividade parokiál, oratóriu, no husi 1990 Ir.Paola, ne’ebé iha momentu ne’ebá diretora iha uma ne’ebá,loke klínika ki’ik-oan ida hodi enfermeiru/a estatál balun sira-nia kolaborasaun.
Iha 1990 loke uma ida iha kapitál, atu irmán sira bele hanorin iha eskolaida ne’ebé antigu alunu salezianu sira mak kaer no loke mós oratóriu ida ho foin-sa’e barak liu ne’ebé bá Dili atu estuda iha universidade.
Iha 1994 loke eskola tékniku-profisionál ida, nafatin iha Venilale, atu favorese menina sira-nia insersaun ih amundu servisu nian no sira-nia emansipasaun. Ih amomentu ne’ebá eskola iha diresaun rua: kuziña no suku, maibé iha tinan ikus hirak ne’e eskola muda ba eskola “Htelaria e Turismo”. Iha mós internadu ida ne’ebé halo parte ba eskola nune’e iha 1995 harii mós komunidade ida irmán sira-nian.
Nafatin iha 1995 loke komunidade “Beata M. Morano” iha Fuiloro, ho internadu ida ba menina sira eskola agríkula salezianu sira-nian. Iha 1996 komunidade “Beata Laura Vicuña” iha Laga, ho orfanatu ida ba menina ne’ebé frekuenta eskola to’o eskola média no mós atividade parokiál sira.
Iha 1999 loke uma dahuluk iha Indonesia, Jakarta, atu simu irmán sira ne’ebé kontinua sira-nia estudu no sira ne’ebé atu ba Timór tenke liu husi Jakarta.
Iha comoro loke eskola elementária “Maria Auxiliadora” molok referendu, no tanba komunidade seidauk rezidente, momentu mosu violénsia iha kapitál, eskola nia parte ida hetan sunu.
Liu tiha 1999, tinan referendu nian ba independénsia Timór nian, no husi violénsia ne’ebé mosu tanba milísia pro-Indonézia nia hahalok, hahú períodu ida ajustamentu nian iha komunidade.
Iha 2003 iha Comoro, eskola elementária “Maria Auxiliadora” sai responsabilidade komunidade “Beata Eusebia Palomino” nian no iha rai hanesan harii mós uma “S. Giuseppe” ne’ebé halo nia funsaun nu’udar uma provinsiál no hamutuk sai mós uma novisiadu.
Iha 2004 iha Baucau loke uma ida tanba Bispu Basílio do Nascimento nia pedidu, ba pastorál iha kadeia Baucau-Buruma (ne’ebé taka tinan ruma liubá) no sai mós fatin ba irmán sira ne’ebé estuda iha “Instituto católico para Formação de Professores”
Iha 2006 Loke “Centro de Formação João Paulo II”: estrutura ida ho kuartu 18 ba kama rua, salaun boot ida no ida ki’ik uitoan no bele fahe ba rua; no fó posibilidade ba alojamentu no hahán. Iha estrutura ida-ne’e hela ffoin-sa’e sira ne’ebé ramata ona kursu iha eskola “Hotelaria e Turismo” Venilale.
Iha 2008 loke komunidade “Beata Maria Romero” iha aldeia Kailako nian, distritu Maliana nian,iha zona fronteira ho Indonézia, zona ida kiak liu, estrada la di’ak, kuran rekursu ekonómiku. Komunidade foun harii besik kapela aldeia nian, dedika an ba obra pastorál hanesan oratóriu no vizita ba famílai sira, liuliu fó apoiu ba feto sira nian dezenvolvimentu iha “microbusiness” ruma.
Komunidade ikus loke iha Dili – Comoro iha 2009, ho ajuda husi projetu CEE, ne’ebé hetan monitorizasaun husi ajénsia española ida: ne’e mak komunidade “Divina Providénsia” ne’ebé responsavel ba Centro “João Paulo II” no unidade rua produsaun nian ne’ebé depende ba eskola profisionál Venilale nian no kursu profisionál Fuiluro nian. Unidade rua ne’e ida ba suku nian no ida fali paderia, pastelaria no catering. Antiga aluna sira mak servisu iha fatin rua ne’e no alunu sira durante períodu estájiu prátiku nian.
