Dili – Iha loron festa S. Francisco de Sales nian, Família Saleziana Timor-Leste, liuliu Asosiasaun “Salesianos Cooperadores” hasolok ho membru foun na’in haat ne’ebé ohin halo sira-nia promesa. Membru na’in haat ne’e mak Manuela Pereira Lobato, Pascoela L., Ilda da Conceição Maria Lobato no Lorenço de Jesus da Silva. Depoizde tinan rua formasaun nu’udar aspirante sira ohin halo sira nia promesa atu moris tuir projetu apostóliku Don Bosco nian, nune’e kontribui ba juventude nia salvasaun.
Selebrasaun eukarístika konselebra husi padre Apolinário, padre Domingos, padre Rui, padre João Roque, padre Carlos, padre Alarico no padre João Paulino (provinsiál SDB) nu’udar selebrante mahuluk. Durante ninia omilia, padre João Paulino fó hanoin uluknanai kona-ba S. Francisco de Sales nu’udar padroeiro la’ós de’it SDB sira-nian maibé Família Saleziana tomak. Tuir nia, motivu tansá Don Bosco hili nia nu’udar mahein ba ninia obra mak santu ne’e ninia karidade pastorál no ninia laran-maus. Don Bosco hakarak katak ida-ne’e sai karakterístika membru sira Pia Sosiedade de S. Francisco de Sales (SDB) nune’e mós membru hotu Família Saleziana ne’ebé oras ne’e halo parte hamutuk 29. Iha Timor-Leste iha ona grupu 5: SDB, FMA, Salesianos Cooperadores, ADMA, VDB.
Padre João Paulino mós fó hanoin fali identidade “salesiano cooperador” , katak sira mak salezianu loloos iha mundu hodi moris sira-nia fiar tuir projetu evanjéliku Don Bosco nian. Sira nia karizma mak karizma salezianu moris iha vida loroloron nian, iha família laran, iha serbisu fatin, iha sosiedade. Objetivu finál mak SANTIDADE. Iha sira-nia knaar sira kolabora iha formasaun umana no relijioza juventude nian, liuliu husi klase populár sira.
Molok misa remata, señor Américo, agradese kongregasaun saleziana ba formasaun sira simu no mós simu sira iha Família Saleziana. Nia mós husu ba membru foun na’in haat dada tan maluk barak atu tuir sira-nia ain-fatin nune’e iha tinan 2015 bele iha tan membru foun ne’ebé halo promesa atu sai salezianu kooperadór.
Iha Dili, membru “salesianos cooperadores” hamutuk na’in 19 no padre Apolinário Neto mak sira-nia delegadu no enkarregadu formasaun nian.
