Sidade Vaticano – Iha katekeze kuarta 23, Bento XVI hahú reflesaun kona-ba Kredu, profisaun fiar nian. Nia enfatiza ezemplu Abraun nian, ne’ebé simu ho laran tomak Maromak nia bolun. Hafoin nia esplika signifikadu espresaun “Ha’u fiar Maromak” .
Afirmasaun “Ha’u fiar Maromak” mak fundamentál maski simples, loke mundu ida relasionamentu nian ho Na’i no ninia mistériu. “Fiar iha Maromak signifika adezaun ba Nia, simu ninia Liafuan no obediénsia iha ksolok ba ninia revelasaun”, haktuir Amu-Papa”.
No atu rona Maromak nia liafuan ita iha Sagrada Eskritura, Nia fó hanoin katak Bíblia ko’alia kona-ba fiar no hanorin fiar hodi narra istória iha ne’ebé Maromak sai besik ba ema, liuhusi figura oioin ne’ebé fiar iha Nia no konfia iha Nia. Ida mak Abraun. Amu-Papa hateten katak “Abraun, patriarka boot, modelu ezemplár, aman fiar-na’in hotu nian (kf Rm 4, 11-12)”
Maski Abraun la komprende buat ida, nia fiar ba Maromak la doko, nune’e, tuir Santu-Padre, bainhira ita dehan “Ha’u fiar Maormak” ha’u hanesan mós Abraun, konfia iha Maromak.
Bainhira “dehan “Ha’u fiar Maromak” signifika katak Maromak mak fundamentu ba ha’u-nia moris, katak ha’u husik nia Liafuan orienta ha’u loroloron, iha hilin konkretu sira, hodi la ta’uk atu lakon buat ruma husi an rasik”, Amu-Papa dehan.
