Segunda-Feira, loron 02-02-2026, Irmán nain tolu: Ir. Adelaide, FMA, Ir. Adelia, FMA no Ir. Agostinha, FMA remata ona sira nia formasam segundo noviciado fulan dahuluk nian ne’ebe hahu iha loron 02-01-2026 liubá. Tema sira ne’ebe simu no reflete iha preparasaun fulan dahuluk nian mak: Introdusaun kona ba natureza segundo noviciado ne’e rasik ho Ir. Evangelina, FMA, vida fraterna ho Ir. Ermelinda Gomes, FMA, unidade vokasional ho Ir. Alexandrina, FMA, pastoral juvenil ho Ir. Julia, FMA, dimensaun orasaun ho Ir. Sebastiana, FMA, votu pobreza ho Ir. Lany FMA, votu kastidade ho Ir. Alma, FMA, votu obediensia ho Ir. Evangelina, ritu profesaun nian ho Ir. Angelita,FMA no ikus liu taka ho verifika hamutuk fali ho Ir. Evangelina,FMA.
Segundo Noviciado ne’ebe sai nu’udar momento grasa nian atu haklean no konfigura-an iha Kristu, no tuir Nia iha espiritu Don Bosco no Madre Mazzarello, momentu ba pauza no renovasaun interior hodi konsiente liutan ba vokasaun ne’ebe simu no assume ho ksolok no liberdade tomak iha Institutu Filhas de Maria Auxiliadora. Agradese wain Irmán formadora sira ne’ebe dedika ona sira nia tempo no ho domin fahe ho ami rikusoin espiritual hirak ne’e atu hafoun no hakbiit ami nia sim loron-loron nian hodi preapra ba sim definitiva ida ba Na’i, iha profesaun perpetua.
Durante formasaun ne’e, irmán sira simu no haklean tema sira ne’e liuhusi konferensia, reflesaun pessoal, kondivizaun iha grupo, selebrasaun, laboratóriu no adorasaun tuir formadora ida-idak nia inisiativa no kreatividade. Atividade hirak ne’e hala’o iha aula enkontru Uma Provinsial Inspetoria nian iha Comoro no balun iha ambiente liur.
Formasaun remata ho Lectio kona ba pasajen biblika Evanjellu São João 4:1-42, enkontru ho Jesus dalabarak liu iha itinerario sira moris nian ne’ebe ita la espera, maibe Maromak tama iha ema nia istoria, no kontinua hakonu ita ho Ninia Be’e moris nian, ne’ebe halo ita hetan plenitude moris nian iha Nia no sente nessesidade atu fahe ho ksolok ba ita nia maun-alin sira, liuliu sira ne’ebe kiik no kiak liu. Tha serteza nafatin katak Maromak la husi mesak hirak ne’ebe Nia fihir no bolu, atu sai Ninia sasin domin nian.
Ir. A. Gabriel, FMA
