Iha Angelus, Leão XIV subliña oinsá Kristu nia hateken ba ema nia terus sai kompromisu konkretu ba kura no redensaun. No maske mundu hetan opresaun husi funu, violénsia, konsumizmu, no deziluzaun, Pontífise husu atu servisu gratuitu ba sira ne’ebé terus, hodi promove justisa no esperansa.
“Opresaun ne’ebé harahun,” hamutuk ho “violénsia ne’ebé halakon forsa.” ” kanek funu nian,” hamutuk ho “konsumizmu mamuk.” No dala ida tan, “oin sira ne’ebé taka ho máskara, família sira ne’ebé fahe malu tanba funu, no joven sira ne’ebé hetan iluzaun hosi ideál falsu sira.” Ida-ne’e Jezús haree bainhira “Hateke ba ema, hateke ba umanidade,” maibé Nia “haree no hadomi”.
Ne’e mak liafuan husi katekeze Papa Leão XIV nian iha Angelus, Domingu, 14 Juñu, iha Prasa S. Pedro – wainhira fila husi viajen apostóliku ba España – fó komentáriu ba Evanjellu domingu nian (Mt 9,36–10,8), iha ne’ebé Jezús nia kompaixaun ba povu tradús ba ninia dixípulu sira hodi kontinua ninia obra proklamasaun nian, ho espíritu laran-luak no servisu nian.
Jesus nia hateken ne’ebé atenta
Istória Evanjeliku ida ne’ebé Amu-Papa, hato’o husi janela ninia estudu nian iha Palásiu Apostóliku, ba fiar-na’in rihun ruanulu resin ne’ebé prezente no balun ne’ebe akompaña liu husi media, define katak “prezente boot ida” tanba “envolve ema hotu ne’ebé rona nia iha Jezús nia hateken” no “fó sasin kona-ba atensaun hosi ninia hateken”, partikularmente sira ne’ebé “kole no forsa laih”iha ne’ebe Maromak nia Oan-Mane iha “kompaisaun.”
Jezús haree no hadomi. Nia hadomi no terus tan ita, hamutuk ho ita: ninia kompaixaun esprime la’ós de’it proximidade fraterna, maibé hakaran redensaun nian.
Ne’e mak Jezús nia reasaun, ne’ebé “hatene ita-nia fuan no tau matan”: hasoru ema sira ne’ebé hanesan “bibi sira ne’ebé la iha bibi-atan”, Kristu saran an ba ema hotu “hanesan bibi-atan di’ak no, nu’udar Na’in ba to’os, ne’ebe haruka serbisu-na’in sira ba to’os mundu nian”. Sira nia knaar maka atu fornese “Maromak nia konfortu ba sira ne’ebé terus,” “atu lori karidade iha ne’ebé iha mizéria, esperansa iha ne’ebé iha aflisaun, fiar iha ne’ebé iha deskonfiansa.”
Liafuan Moris no Loos
Ida ba ida, Evanjellu temi “traballadór” dahuluk, nain sanulu-resin-rua, “dixípulu sira sai apóstolu, katak misionáriu no haklaken-na’in”: entre sira, Simão hanaran Pedro, ida uluk, no Judas Iscariotes, ida ikus, “atu fó hanoin mai ita”, Amu-Papa subliña, “katak ema ida bele tuir Jezús no trai nia, maibé Evanjellu nafatin liafuan moris no lia-loos ba ema hotu”.
Notísia di’ak ne’ebé hale’u sékulu sira hanesan de’it, sempre joven, fresku, no libertadór: “Reinu Lalehan nian besik ona!”
Reinu ida ne’ebé “besik ona” tanba iha Jezús, “Maromak hakbesik ba mane no feto hotu-hotu, ba povu no nasaun hotu-hotu”. No bainhira Evanjellu ida-ne’e “haklaken no pratika, buat aat monu hanesan moras ida ne’ebé remata, hanesan kalan ida ne’ebé fó fatin ba loro-matan, hanesan mate ne’ebé konkista hosi Ida-ne’ebé Moris-Hi’as.”
Misaun Gratuita ida
Ho dalan ida-ne’e, Jezús nia hateken iha kapasidade atu nakfilak realidade: «nakonu ho domin, ninia inisiativa fó moris foun ba povu, Kreda, bolu atu kontinua apóstolu sira-nia misaun», fó ho laran-luak hanesan simu ho laran-luak. Gratuita tomak, Jezús nia prezente iha valór ida ne’ebé “liu sasukat hotu: imposivel atu merese ka ‘sosa’ ida-ne’e.”
Knaar evanjeliza nian mosu husi Maromak nia don, ne ebé iha Kristu sai perdaun ba mundu, serbi ba sira ne ebé ki ik liu no kiak liu, no empeñu ba justisa.
Ikusmai, Pontífise invoka Na’i-Feto nia tulun atu hatán «ho ksolok no korajen ba misaun ne’ebé Jezús bolu ita».
Fonte: Vatican News
