Sidade Vaticano – Tema Papa Francisco nia katekeze kuarta 7 Marsu mak kona-ba Orasaun Eukarístika. Tuir ritu eukarístiku aprezentasaun paun no tua nian, Amu-Papa enfatiza katak Orasaun Eukarístika kualifika selebrasaun Missa nian no konstitui momentu sentrál, atu to’o ba Sagrada Komuñaun.
“Korresponde ba buat ne’ebé Jezús rasik halo, iha meza ho ninia apóstolu sira iha Han-Kalan Ikus, bainhira, “agradese” ba paun no depois kálix tua nian (Mt 26,27, Mc 14,23, Lc 22,17,19; 1 Cor 11,24): ninia “ação de graças” sai moris fali iha Eukaristia tomak, hodi halo ita hola parte ba Ninia sakrifísiu salvasaun nian”, Santu Padre destaka.
Iha Missal iha fórmula oioin Orasaun Eukarístika nian, hotu-hotu ho elementu karakterístiku sira. “Uluknanai, iha ‘Prefácio’, ‘ação de graças’ ida ba Maromak nia don sira, liuliu tan haruka nia Oan-Mane nu’udar Makso’ik. ‘Prefácio’ remata ho aklamasaun ‘Santu’, normalmente hananu. Furak atu hananu ‘Santu’: “Santu, Santu, Santu, Na’i”. Di’ak atu hananu”, Papa Farancisco hateten.
Papa Francisco fó hanoin tan katak la iha buat ida naran ‘haluha’ durante Eukaristia, maibé, buat hotu lori ba Maromak. “La haluha ema ida. No se ha’u iha ema ruma, parente sira, belun sira, ema ne’ebé presiza ne’ebé hakat husi mundu ne’e ba ida seluk, ha’u bele temi sira iha momentu ida-ne’e, interiormente no iha silénsiu eh hakerek atu bele lee ninia naran”, nia subliña.
“Padre, ha’u tenke selu hira atu ha’u nia naran bele lee iha-ne’ebá?” – “La selu buat ida”. Imi komprende ida-ne’e? La selu buat ida! La selu Missa. Missa mak Kristu nia sakrifísiu ne’ebé gratuitu. Redensaun gratuita. Se ó hakarak halo oferta ida, halo bá, maibé la eziste pagamentu. Ida-ne’e importante atu komprende”, Amu-Papa hatutan.
Ikusmai, Amu-Papa fó hanoin fórmula antiga ida atu komprende Eukaristia didi’ak. Labele falta atitude tolu iha Jezús nia eskolante sira. “Primeiru, aprende ‘agradese, sempre no iha fatin hotu’ no la’ós de’it iha okaziaun ruma, bainhira buat hotu loos; iha fatin segundu, halo ita-nia moris don ida domin nian, livre no gratuitu; terseiru, harii komuñaun konkreta iha Igreja no ho ema hotu. Nune’e, orasaun sentrál Missa nian ida-ne’e eduka ita, uitoan-uitoan, atu halo ita-nia moris ‘Eukaristia’ ida, katak, ‘Ação de Graças’”, nia remata.
