Kristu nia apelu oportunu tebes, Amu-Papa konsidera “notísia konflitu sira, kalamidade sira, no persegisaun sira ne’ebé tormenta ema millaun resin” loron-loron. Maski hasoru aflisaun sira-ne’e ho indiferensa ne’ebé buka atu ignora ema sira, Jezús nia liafuan sira haklaken katak agresaun aat nian labele halakon ema sira nia esperansa ne’ebé laran metin iha Nia. Wainhira iha tempu ne’ebé nakukun liu, fiar sei nabilan liu hanesan loro-matan.
Armas no Manipulasaun Ideolójika, Ferramenta sira Persegisaun nian.
Persegisaun ba sarani sira, defaktu, akontese la’ós de’it ho kilat no maltratamentu, maibé mós ho liafuan, katak liuhusi lia-bosok no manipulasaun ideolójika. Liuliu bainhira ita hetan opresaun husi buat aat sira-ne’e, fíziku no morál, ita simu bolun atu fó sasin ba lia-loos ne’ebé salva mundu, ba justisa ne’ebé soi povu sira husi opresaun, ba esperansa ne’ebé hatudu dalan ba dame ba ema hotu.
Transfigura Violénsia ba Sinál Redensaun nian
Reziste ba insultu, violénsia, no traisaun. Jezús nia moris, to o iha Krús, marka beibeik ho postura ida-ne e. Papa Leão fó hanoin mai ita katak “dezastre no tristeza sira istória nian iha rohan, enkuantu ksolok sira ne’ebé rekoñese Nia nu’udar Maksoin destinadu atu dura ba nafatin.” No nia hateke ba sasin sira ho di’ak liu, mártir sira: Iha Kreda nia istória tomak, liuliu mártir sira mak fó hanoin mai ita katak Maromak nia grasa iha kapasidade atu transforma maski violénsia iha sinál redensaun nian. Tan ne’e, halibur ita-nia an ho ita-nia maun-alin sira ne’ebé terus tanba Jezús nia naran, ita ho laran-metin buka intersesaun Maria nian, Tulun-na’in sarani sira-nian. Iha provasaun no difikuldade hotu-hotu, atu Virjen Santa konsola no sustenta ita.
Fonte: Vatican News
