Papa Leão XIV iha ninia katekeze ba audiénsia jerál, subliña kona ba fraternidade, ” nu’udar dezafiu ida boot liu umanidade”, labele konsidera hanesan buat baibain ka imediatu, no “funu barak iha mundu tomak, tensaun sosiál sira, no sentimentu ódiu nian parese hatudu kontráriu.” Hodi fiar iha Kristu moris-hi’as, Pontífise subliña, ema esperimenta sai maun-alin no aprende atu moris tuir ukun-fuan domin nian.
Fraternidade ne’ebé Kristu haraik, mate no moris-hi’as, liberta ita husi lójika negativa egoízmu nian, divizaun no arogánsia sira, no restaura ita ba ita-nia vokasaun orijinál, iha domin no esperansa ne’ebé hafoun loroloron. Ida ne’ebé Moris-Hi’as hatudu mai ita dalan atu la’o hamutuk ho Nia, atu ita bele sente no sai “maun-alin ba malu”.
Iha Jezús nia Moris-Hi’as, ita sai sasin, hanesan dixípulu sira, istória foun ida iha-ne’ebé fraternidade buras. Ida-ne’e mak fuan husi konseitu katekeze Papa Leão XIV nian iha audiénsia jerál. Papa kontinua siklu Jubileu nian “Jezús Kristu Ita-nia Esperansa” no dedika ninia reflesaun ba tema “Espiritualidade Páskua nian inspira fraternidade.Pontífise subliña, hadomi malu hanesan ha’u hadomi imi, “fiar iha Kristu nia mate no moris-hi’as no moris espiritualidade Páskua nian kuda esperansa iha moris no enkoraja ita atu investe iha buat di’ak.”
Funu mak Kontrariu husi fraternidade
“Omnes frates. Maun alin sira hotu”: ida-ne’e maka saudasaun ne’ebé Saun Francisco dirije ba ema sira, la hodi haree ba sira nia orijen jeográfika, kulturál, relijioza no doutrina. Papa Leão konvida ita atu deskobre filafali ninia signifikadu iha katekeze, hodi subliña katak saudasaun saun Francisco Assis nian «tau ema hotu iha nivel hanesan, presizamente tanba rekoñese sira-nia destinu komún dignidade, diálogu, aseitasaun no salvasaun nian». Amu-Papa hatutan tan, ikusmai Amu-Papa Francisco foti iha ensíklika Fratelli tutti tanba fraternidade reprezenta “dezafiu boot ida ba umanidade kontemporánea”, ne’ebe moris hosi kapasidade atu harii relasaun no ligasaun auténtiku sira, ne’ebé liberta ita hosi narsisizmu no hosi haree iha ema seluk “lahó vontade atu fó, hodi fó ho loloos, hodi fó ita-nia an rasik.”
Ita hatene didi’ak katak to’o ohin loron, fraternidade la mosu hanesan buat ida ne’ebé fó; ida-ne’e la’ós imediatu. Konflitu barak, funu barak iha mundu tomak, tensaun sosiál sira, no sentimentu ódiu nian sei hatudu kontráriu. Maibé, fraternidade la’ós mehi ida ne’ebé furak, imposivel, no mós la’ós desideriu balun iha ilusaun.
Abut husi fraternidade mak naroman ne’ebé mai husi Kristu, ida de’it ne’ebé “liberta ita husi beneno inimigu nian”. Mesmu iha relasaun besik liu entre parente sira no parente ran nian, bele mos hamosu separasaun no ódiu.
Liafuan “maun” mai husi abut antigu liu, katak tau matan, hafolin, suporta, no sustenta. Aplika ba ema ida-idak, ida-ne’e sai hanesan apelu ida, konvite ida.
Jesus nia Ukun-Fuan
Saun Francisco nia “maun alin hotu” maka “sinál akollimentu nian ba fraternidade universál”, “karakterístika esensiál ida hosi kristaun, ne’ebé hosi inísiu maka proklamasaun Liafuan Di’ak nian ne’ebé destina ba ema hotu nia salvasaun, nunka iha forma eskluziva ka privada.”
Fraternidade ida-ne’ebe bazeia ba Jezús nia ukun-fuan, ne’ebé foun tanba kumpre husi Nia rasik, halo tuir superabundante Aman nia vontade: agradese ba Nia, ne’ebé hadomi ita no saran An ba ita, ita mós bele hadomi malu no saran ita-nia moris ba ema seluk, nu’udar Aman ida de’it nia oan sira no maun-alin loos iha Jezús Kristu.
Papa aumenta tan katak , Jezús, besik atu remata, esperimenta tormenta no abandonu ne’ebé teribel, maibé iha duni Ninia Moris-Hi’as mak hahú istória foun ida iha-ne’ebé “dixípulu sira sai maun-alin ba malu” tanba sira rekoñese Nia nu’udar Ida-ne’ebé Moris-Hi’as, “simu prezente Espíritu nian no sai sasin ba ida-ne’e”.
Fonte: Vatican.News
