Maun alin sira, ksolok domingo nian!
Iha loron Dedikasaun Bazílika Lateraun nian, ita kontempla mistériu unidade no komuñaun nian ho Kreda Roma nian, bolu atu sai inan ne’ebé tau matan ho solisitasaun ba fiar no viajen sarani sira nian iha mundu tomak.
Katedrál Dioseze Roma nian no sede Susesór Pedro nian, hanesan ita hatene, la’ós de’it obra ida ho signifikadu istóriku, artístiku no relijiozu estraordináriu, maibé mós reprezenta forsa mos sentru defensor fiar nian ne’ebé Apóstolu sira fó fiar no salvaguarda no ninia transmisaun iha istória tomak. Mistériu ida-ne’e nia grandeza mós nabilan iha esplendor artístiku edifísiu nian, ne’ebé iha nia parte sentrál konserva estátua boot sanulu-resin-rua Apóstolu sira-nian, Kristu nia seguidor dahuluk sira no sasin sira Evanjellu nian.
Ida-ne’e lori ita ba hateken espirituál ida, ne’ebé tulun ita atu hakat liu aparénsia esterna sira, atu kaer iha mistériu sira Kreda nian barak liután duké fatin simples ida, espasu fíziku ida, edifísiu ida halo ho fatuk; Iha realidade, hanesan Evanjellu fó hanoin mai ita iha epizódiu Jezús nia purifikasaun ba Templu Jeruzalén nian (João 2:13-22), santuáriu loloos Maromak nian mak Kristu, mate no moris-hi’as. Nia mak mediadór úniku salvasaun nian, redentór úniku, Ida ne’ebé, hodi kesi-an ba ita-nia umanidade no transforma ita ho ninia domin, reprezenta odamatan (João 10:9) ne’ebé loke luan ba ita no lori ita ba Aman Maromak.
No, hamutuk ho Nia, ita mós fatuk moris edifísiu espirituál ida-ne’e nian (1 Pedro 2:4-5). Ita maka Kristu nia Kreda, Ninia isin lolon, Ninia membru sira ne’ebé bolu atu habelar Ninia Evanjellu mizerikórdia nian, konsolasaun nian no dame nian iha mundu tomak, liuhusi adorasaun espirituál ne’ebé tenke nabilan liuliu iha ita-nia sasin moris nian.
Maun-alin sira, iha hateken espirituál ida-ne’e mak ita tenke treinu ita-nia fuan. Dala barak, sarani sira-nia frajilidade no erru sira, hamutuk ho fatin komun sira no prejuizu oioin, impede ita atu simu rikusoin mistériu Kreda nian; Ninia santidade, defaktu, la hela iha ita-nia méritu sira, maibé iha “prezente Na’i nian, ne’ebé nunka retraídu”, ne’ebé kontinua hili “nu’udar vazu ninia prezensa nian, ho domin paradósal, maski no presizamente hafoer ema nia liman sira” (J. Ratzinger, Introdusaun ba Kristaun, Brescia 2005, 333).
Entaun mai ita la’o iha ksolok nu’udar Povu santu ne’ebé Maromak hili no invoka Maria, Kreda nia Inan, atu tulun ita simu Kristu no akompaña ita ho ninia intersesaun.
Fonte: Vatican.Va
