Iha loron 19 Agostu 2026, Reitór-Mor Salezianu Don Bosco nian, Pe. Fabio Attard, fó sai ofisialmente tema Streia 2027 nian, hodi oferese ba Família Saleziana reflesaun ida ne’ebé fo naroman ba kamiñu tinan ikus ne’e nian no loke perspetiva foun ba futuru.
«Karidade mak pasiénsia, karidade mak laran-di’ak – ‘Konsagradu sira’ ba foin-sa’e sira-nia di’ak integrál»: Títulu ne’ebé hili fó hanoin S. Paulo nia knananuk ba karidade no abut iha tradisaun edukativa saleziana, ne’ebé sentradu iha Sistema Preventivu Don Bosco nian. Konvite atu hafoun empeñu pastorál no formativu ba foin-sa’e sira, liuliu sira ne’ebé frajil liu.
Aprezentasaun Streia nian akontese iha kontestu ida ne’ebé signifikativu tebes, ne’ebé hanoin fila fali ba períodu tinan tolu 1875-1877, ne’ebé riku ho eventu fundadór sira nian. Nune’e Pe. Attard fo hanoin hikas aniversáriu tolu ne’ebé signifikativu tebes:
- Tinan 150 moris Kongregasaun no Família Saleziana;
- Espedisaun dahuluk misionária Salezianu sira-nian iha tinan 1875 no Filhas de Maria Auxiliadora iha tinan 1877—sai ona sentru Streia 2025 nian, “Ankoradu iha Esperansa, Peregrinu ho Foin-sa’e sira”, selebra iha espíritu Jubileu nian;
- Fundasaun Kooperadór Salezianu sira-nian, fo hanoin hikas iha Streia 2026, “Halo buat hotu ne’ebe Nia Hateten ba imi—fiar nain sira, livre atu Serbí”, ho atensaun partikulár ba Maria nia prezensa iha Kana, oportunu tebes ba Kreda, mundu, no Família Saleziana ohin loron nian.
ba aniversáriu sira-ne’e aumenta tan hakerek ida husi tinan 1877, testu fundamental Don Bosco nian, “Sistema Preventivu iha Edukasaun Foin-sa’e sira-nian”, ne’ebe selebra mos tinan 150.
Títulu Streia nian repete liafuan sira ne’ebé Don Bosco deskreve fundamentu ninia métodu edukativu nian, hodi sita Saun Paulo: “Prátika sistema ne’e nian bazeia tomak ba Saun Paulo nia liafuan sira ne’ebé dehan: ‘Karidade mak laran-di’ak no pasiénsia; terus ba buat hotu, maibé hein buat hotu no tahan ba disturbu hotu”. Esperasaun “‘Konsagradu sira’ ba foin-sa’e sira-nia di’ak integrál” fo hanoin hikas ezortasaun ida ne’ebe Don Bosco uza iha okaziaun rua, hatudu katak diretór no edukadór tenke dedika-an tomak ba labarik sira, empeñadu ba sira-nia kreximentu umanu, morál no kulturál.
Padre Attard fahe Strenna 2027 ba seksaun prinsipál rua:
Parte dahuluk haklean kapítulu 13 hosi Surat Dahuluk ba Korintu sira, iha-ne’ebé Saun Paulo aprezenta karidade nu’udar “dalan ne’ebé sublime liu”. Iha ne’ebe kontestu marka ho tensaun no divizaun sira, Apóstolu hatudu domin nu’udar kritériu desizivu atu verifika autentisidade moris sarani nian. Introdusaun hateten: “Ita bele ko’alia lian hotu-hotu, hatene mistériu sira Maromak nian, iha fiar estraordináriu, no hala’o hahalok eroiku sira, maibé lahó domin ita hanesan halo barullu deit, no buat hotu ne’ebé ita halo lakon nia valór profundo.” Ba Família Saleziana, ida-ne’e sai konvite ida atu sukat ninia karidade pastorál ba foin-sa’e sira iha roman Evanjellu nian.
Parte daruak interpreta filafali pilar tolu hosi Sistema Preventivu tuir dezafiu kontemporáneu nian. Iha nível razaun nian, Padre Attard propoin atu deskobre hikas Sistema Preventivu nu’udar “pedagojia enkontru nian”, ne’ebé foka la’ós iha programa ka estrutura sira, maibé iha foin-sa’e konkretu no harii iha rede edukativa kondiviza, tuir ezemplu Valdocco nian: rede sira ne’ebé harii ho foin-sa’e sira, la’ós de’it ba foin-sa’e sira. Iha nivel relijiaun nian, nia konvida ita atu rekoñese “hamrook espirituál” ne’ebé hela iha foin-sa’e sira nia fuan, dalabarak subar iha solidaun nia laran, hiperkoneksaun no falta silénsiu, hodi akompaña sira iha dixernimentu ba Maromak nia lian. Iha nivel amorevoleza/domin nian, nia hanoin hikas estilu Jezús Bibi-Atan Di’ak nian no peregrinu ba Emaus, ne’ebé bele la’o hamutuk, rona no fó naroman; besik ida ne’ebé Don Bosco enkarna ho predilesaun ba foin-sa’e sira ne’ebé kiak liu.
Padre Attard fó hanoin mai ita katak Sistema Preventivu la’ós de’it métodu edukativu ida, maibé prezente karizmátiku ida ne’ebé entrega ba Família Saleziana. “Karizma no kompeténsia la’o hamutuk ba foinsa’e sira nia di’ak integrál”, nia hakerek, hodi konvida ita atu tau matan ba rikusoin ida-ne’e ho seriedade, koñesimentu, no haraik-an.
Atensaun foka ba streia 2027 nian hamoris fali iha ema hotu, iha ema barak, prioridade edukasaun nian.
Hanesan Lucio Lombardo Radice afirma, pegagojista leigu no laos fiar-na’in ida, ne’ebé admira tebes Don Bosco, hateten: “Ba ami ne’ebé la hola parte ba Kreda no igreja hotu-hotu, nia mós eroi ida, eroi edukasaun preventiva nian… Don Bosco iha ideia ida de’it, mak ida de’it: EDUKA. Ita bele lakon buat hotu—uma sira, obra sira no estrutura sira—maibé ita la lakon Sistema Preventiva, imi la lakon buat ida. Se imi lakon ida-ne’e, imi lakon ona Don Bosco.” Sasin ida-ne’e konfirma forsa pedagojia saleziana no karizma nian.
Nune’e, Strenna 2027 aprezenta an nu’udar oportunidade folin-boot ida atu selebra aniversáriu ba dala 150 Sistema Preventivu nian no atu lansa filafali, iha mundu salezianu tomak, kompromisu renovadu ba edukasaun no pastorál.
Fonte: cgfmanet.org
