Liturjia Domingu XXXIII Tempu Komún nian fó hanoin ba sarani ida-idak responsabilidade atu sai, iha tempu istóriku ne’ebé ita moris bá, sasin konxiente, ativa no kompromete an ho projetu salvasaun Maromak nian ba ema sira.

Evanjellu aprezenta mai ita ezemplu rua kontráriu ba malu kona-ba oinsá hein no prepara an ba Jezús ne’ebé mai iha loron ikus. Evanjellu hahí dixípulu ne’ebé haka’as an atu halo funan barak “soin sira” ne’ebé Maromak konfia ba nian;  no kondena dixípulu ne’ebé hela iha ta’uk no apatia no la halo funan “soin sira” ne’ebé Maromak entrega (halo nune’e, nia estraga de’it Maromak nia don sira no hasai husi maluk sira, husi Kreda no mundu funan sira ne’ebé sira iha direitu bá).

Iha leitura daruak, Paulo halo klaru katak importante la’ós  hatene bainhira Na’i mai ba dala rua; maibé sai matan moris no vijilante, hodi moris tuir Jezús nia hanorin sira, hodi fó sasin ba ninia projetu sira, ho haka’as an ho modu ativu ba konstrusaun Reinu nian.

Leitura dahuluk aprezenta, iha figura feto virtude nian, valór ruma ne’ebé asegura ksolok, ézitu, realizasaun. Autór “matenek-na’in” testu nian propoin, liuliu, valór sira serbisu nian, kompromisu nian, laran-luak nian, “hamta’uk Maromak nian”. Valór sira-ne’e la’ós de’it feto virtude-na’in nian: dixípulu ne’ebé hakarak moris iha fidelidade ba Maromak nia projetu no korresponde ba misaun Maromak konfia ba nia, tenke hatais an ho valór sira-ne’e.

Download