Ohin kreda tomak selebra festa “ Cátedra de São Pedro” eh Kadeira Saun Pedro nian. Festa ida-ne’e hahú kedas iha sékulu IV ho data 22 Fevereiru. Liafuan “Kátedra “ literalmente hakarak dehan kadeira bispu nian ne’ebé lokaliza iha Igreja-Inan iha Dioseze ida no ho motivu ida-ne’e mak hanaran “Katedrál”; maibé festa ohin la’ós atu fó onra ba kadeira nu’udar mobiliáriu. Festa ohin selebra kona-ba Primadu Papa nian nu’udar ulun Igreja Katólika nian. Kadeira simboliza autoridade bispu nian, partikularmente iha ninia hanorin sira eh “Majistériu” kona-ba Evanjellu, nu’udar susesór Apóstolu sira-nian ne’ebé iha kbiit atu “kore no kesi”.

Festa ohin nu’udar selebrasaun paternidade espirituál Saun Pedro nian, festa ida família ekleziál, ho referénsia ba fundamentu Apóstolu Pedro nian, ida ne’ebé prezide unidade iha Igreja, simu knaar husi Mestre, atu sai Ai-riin no Fatuk moris Igreja nian ne’ebé harii ona ninia sede iha Sidade Rohan-laek nian: “ Ó mak Pedro no iha fatuk ne’e nia leten Ha’u sei harii Ha’u-nia Kreda” ( Mt. 16.18)

Selebra festa Katédra/ Kadeira Saun Pedro nian, ita selebra Maromak nia grasa ne’ebé haraik ba Igreja don ‘infalibilidade’ bainhira hanorin doutrina. Tan ne’e husi kátedra Pedro, Papa sira no Bispu sira hanorin ita kona-ba lia-loos Fiar nian (verdade da Fé).

Mai ita ho atensaun tomak hateke ba “ Pedro” iha tempu ohin loron, ne’ebé hanaran Papa Francisco, reprezentante Pessoa Kristu nian mai ita no susesór Apóstolu Pedro nian; mai ita husik ita an rona lian ida ne’e, ne’ebé mai husi Kátedra Pedro nian –  ho modu infalível –, basá rona nia ita rona ba Kristu nia lian, iha ne’ebé ita nia fiar sai firme no tau fundamentu metin iha Fatuk Kristu nian.