Laga – Loron 13 Maiu mak loron ne’ebé Institutu Filhas de Maria Auxiliadora  iha mundu tomak selebra festa Santa Maria Domingas Mazzarello. Santa Maria Domingas Mazzarello mak Co-fundadora, hamutuk ho Don Bosco funda Institutu Filhas de Maria Auxiliadora- FMA.

Nune’e  ohin iha parokia Laga, sarani sira kapela Lalulai nian hanesan tinan-tinan konvida Irman FMA sira komunidade Laga, hodi selebra hamutuk festa  padrueira nian. Iha loron Domingu irman sira komunidade nian loke video Madre Mazzarello nian ba sarani sira. Iha segunda-feira loron 13 komunidade FMA hamutuk ho labarik Orfaun no animadores oratorio nian ba tuir festa iha Lalulai. Iha festa ne’e iha mos Batizmu, primeira komunaun no kaben.

Iha misa Amu Pároku, Pe. Rui Gomes SDB, hateten katak Madre Mazzarello mak santa ida ne’ebé iha domin boot ba Jezús no Maria. Sei foinsa’e nia preukupa ba ema seluk ninia nesesidade liuliu foinsa’e feto sira iha ninia tempu hodi hanorin suku no fó katekeze. Prontu serbi ema seluk  maske iha situasaun difisil. Serbisu hotu ne’ebé nia halo hakarak  fó Gloria ba Maromak deit. Tan ne’e nia konvida labarik sira atu pontu ida-idak suku nian nu’udar aktu domin nian ba Maromak. Nia Santa ida ne’ebé  haraik-an liu, simples no haksolok nafatin. Amu Pároku husu ba sarani sira atu aprende husi Madre Mazzarello; hadomi Jezús no Maria no mos hatene serbi ema seluk.

Depois de misa han hamutuk, hafoin hatudu atraksi husi labarik sira Lalulai, husi Orfaun sira no mos animadores sira. Ikus liu dahur hamutuk, hafoin fahe malu.

(Alice Gama)