Iha vizita kanónika, Provinsiál FMA anima hotu-hotu ba moris santu

Iha vizita kanónika, Provinsiál FMA anima hotu-hotu ba moris santu

Venilale – Husi loron 6-13 Juñu Komunidade Madre Mazzarello Venilale simu Ir Alma Castagna, Provinsiál FMA TIN iha ninia vizita kanónika (kf Konst.146). Ir Alma hato’o objetivu tolu: atu deskobre santidade loroloron nian iha komunidade ida-ne’e; deskobre santidade iha ema ida-idak, foin-sa’e no kolaboradór/a sira no sira ne’ebé hakbesik ita; tulun haree santidade haleu ita no halo buras, dixerne no akompaña. Ne’e hotu tanba iha tempu ida-ne’e hahú husi Amu-Papa no Reitór-Mór, konvida ita hotu atu moris santidade loroloron nian, buat ruma karizmátiku, katak ita-nian duni. Bainhira Komunidade Edukativa fó benvinda, ho estudente sira ne’ebé dansa “Alza il volume”, Ir Alma konvida kedas atu “hasae volume ksolok nian, hasae volume santidade nian”.

Iha ninia enkontru sira ho ADMA, Profesór/a sira, oratorianu sira, animadór/a sira, kolaboradór seluk nia mós konvida sira atu hateke ba objetivu santidade ida-ne’e, liuhusi knaar ida-idak nian,empeñu ida-idak nian nu’udar membru asosiasaun ka nu’udar estadu moris nian husu.

Ba Irmán sira nia disponivel iha enkontru pesoál, tulun iha serbisu uma-laran no iha klínika, no anima mós enkontru orasaun ida ho métodu “Lectio Divina” kona-ba Salmu 122. Salmu 122 mak Salmu pergerinasaun nian ba Santuáriu Jerusalém, salmu ida ko’alia kona-ba ksolok no dame atu horik iha Maromak nia uman. Iha orasaun ne’e, Irmán sira simu konvite atu hakerek mós sira-nia salmu, paralelu ho Salmu 122 ne’e.

Tuirmai, ami partilla Irmán sira-nia salmu pesoál.

Ir. Santina

Ha’u hahi no agradese Ita Na’i ba  Ita-bo’ot nia prezensa viajen nian hamutuk ho ha’u iha ha’u nia viajen vokasaun nian. Na’i iha ha’u nia viajen sira ne’ebe dala ruma la’o sees husi Ita-bo’ot nia hakaran , tan ha’u nia frakeza pesoal, hodi la tau laran metin ba Ita bo’ot. Maske nune’e Ita bo’ot ne’ebe nakonu ho laran sadia nafatin hein ha’u ho ksolok , orienta ha’u liu husi akontesimentu oi-oin ne’ebe ha’u hasoru,halo ha’u koxiente fali ba Ita Bo’ot, liu husi Ita Bo’ot nia obras furak ne’ebe haleu ha’u  Amen.

Ir. Abelita

Ha’u haksolok tebes Wainhira hala’o peregrina hamutuk ho ha’u nia Irmán  maluk sira foin-sa’e sira no ema hotu ne’ebe ha’u hasoru iha misaun hodi tulun malu uma Maromak nian ne’ebe  nakonu ho domin no ksolok hodi haburas liután moris komuñaun ho Maromak iha komunidade no iha misaun.

 

Ir. Maria Natalina

Ha’u haksolok bainhira ema dehan mai ha’u  ita la’o hamutuk hodi serbí Na’i iha domin, dame, no unidade hodi harí komuñaun, hamutuk  ho Irmán sira, foin-sa’e sira, leigu/a sira, iha esperiensia moris loroloron nian, hanorin ha’u atu la’o ba objetivu ida katak la’o to’o Na’i nia uma hodi ba hasoru ema ida ne’e mak Jezús. La’os kualker dalan halo ha’u to’o Maromak nia uma maibe dalan ne’ebe nokonu ho momentu idak- idak ho sentimentu Jezús nian.

Maromak bolu ha’u  ba vida konsagrada sai santu hodi moris ha’u nia kompromisu ho ksolok.

Ir. Fabiola

Ha’u haksolok wainhira hetan oportunidade atu moris nune’e ha’u bele hahi no agradese Ita Bo’ot.

Ha’u haksolok wainhira bele rona no medita ita futar lian ne’ebe fo roman ba ha’u ain hakat sira.

Ha’u haksolok  wainhira bele hahi hanai Ita hamutuk ha’u nia Irmán sira no foinsa’e sira hodi agradese ba bolun vokasaun santu ne’e.

Ha’u haksolok wainhira ha’u sente katak Ita kontinua haraik  Ita Nia grasa domin no dame nian mai ami. Tulun ami atu ami bele hatutan Ita nia domin no damen ba ema hotu  ne’ebe ami hasoru.

 

Ir.Carolina

Ha’u haksolok basá Na’i bolu ha’u moris iha mundu ne’e, ha’u haksolok ba ha’u nia moris loroloron ba Na’i Nia domin fidelidade  ba ninia domin misericordia; ba grasa fidellidade moris relijiosa nian.

Ita haksolok la’o dalan santidade iha komunidade ida ne’e ;ba Irmán sira nia prezensa la’o hamutuk  ba foin-sa’e sira ba kolaboradór/a no ema oi-oin ne’ebe hasoru hodi habo’ot liután  ha’u nia domin  ba Nia. Ha’u haksolok no agradese ba superior sira nia akompañamento  ba Irmán maluk  maluk sira nia suporta iha liafuan no jestu oin-oin. Ha’u haksolok no agradese ba tema

Kapitulo jeral XXIV kona ba Maria nia prezensa iha kaná, basá pasajen ida ne’e mak sai ha’u nia modelu ba moris tomak hodi moris hamutuk iha komunidade, sosiedade no fatin hotu ha’u hela ba.

 

Ir. Alexandrina Pinto

 Ha’u haksolok tan Na’i bolu ha’u atu la’o tuir Na’i nia dalan sira dalan santidade nian.

Ha’u nia ksolok mai husi Nia domin rohan laek mai ha’u, loron kalan hakonu nia grasa liu husi Paun lalehan nian, liu husi nia Liafuan sira.

Ha’u haksolok tan la’o tuir dalan santidade hamutuk ho nia Irmán sira hamutuk ho foinsa’e sira iha ambiente ksolok domin suporta malu nian.

Ha’u haksolok tan ha’u kontinua la’o, la’os neneik la’o lalais iha dalan kleuk sira dalan nakukunn nian, ha’u fiar Na’i la’o uluk ha’u. Laran metin ba Na’i nia prezensa  ha’u la’o to’o uma lalehan nian Amen.

Ir. Aurea

Komunidade mak Jerusalem daruak fatin no ha’u nia uma, iha ne’ebe bele halibur hamutuk hodi hahí Na’i Nia naran, iha ne’ebe bele fahe ksolok no domin hamutuk hodi simu Na’i nia bensaun.

Komunidade mak Jerusalem daruak iha ne’ebe ha’u bele hahí no agradese Na’i Maromak, ba grasa moris no grasa vokasaun nian.

Komunidade mak Jerusalem daruak iha ne’ebe ha’u bele la’o ba hasoru Na’i hodi halo ha’u nia relasaun  besik liu ba Na’i liu husi orasaun, relasaun iha komunidade ho Irmán sira foinsa’e sira

Fatin ha’u agradese  Na’i ba buat di’ak hotu moris nian.

 

 

Ir. Jacinta Gusmão

Na’ i, ha’u-nia ksolok mak hamutuk ho Ita

Ha’u nia dame mak mak horik ho Ita

Ita mak ha’u nia Rain

Ita mak ha’u nia uman

Ba ita mak ha’u moris

Ba ita mak ha’u mate

No husi loron ne’ebá

Ba nafatin ha’u sei horik

Iha ita nia uman.

 

Ita tau ha’u iha mundu ne’e

Atu lao, atu halo dalan

Dalan peregrinu nian

Iha tempu diak ka aat,

Hamutuk ho maluk sira

Ho Irmán no foin-sae sira

Too loron ha’u hasoru Ita

Oin ho oin iha Ita kadunan.

 

Sei dook ka besik

Ita mak ha’u nia uma, Nai

Ita mak ha’u fatuk-inan

Ita mak ha’u nia futuru

Ha’u nia estabilidade no

ha’u nia abut.

 

Ita nafatin ho ha’u no

Se ha’u nafatin ho ita

Ha’u sei horik duni iha uma

No ba nafatin hananu

Ita-nia kmanek sira

Hamutuk ho ita nia santu sira

Iha paraízu salezianu

Tinan ba tinan

Amen.

Write a Comment

Your e-mail address will not be published.
Required fields are marked*