Baucau – Dioseze Baucau husi tinan 2018-2019, organiza hodi lori Santu Tarcísio nia ilas la’o haleu sentru no bairu sira ne’ebé hola parte ba Parokia Santu António nian. Nune’e mak iha loron 16 fulan Juñu ilas Santu Tarscísio tama iha bairu Teulale ne’ebé nu’udar komunidade ami mós hela iha bairo ne’e, nune’e hamutuk komunidade sarani simu ilas San Tarcísio nian husi dia 16-18; durante loron rua nia laran sarani sira esperiénsia orasaun no buka hodi fahe sira-nia esperiénsia moris nian, nune’e irmã sira na’in rua Ir. Sanzinha diretora no Ir. Ana Ivonia kolabora diretamente ho sarani sira hodi halo dekorasaun no prepara múzika ba Missa no prepara labarik simu atu simu no despedidade ilas santu Tarcísio nian ne’e.

Kreda lokal nia objetivu hodi lori sai ilas ne’e mak atu hametin no habelar devosaun ba Santissimu Sakramentu liuhusi Santu Tarcísio nia prezensa. Formasaun ne’ebé hala’o iha loron hirak ne’e mak reza hamutuk no kalan ikus esperiénsia orasaun kaTaize ne’ebé gia husi Karizmatika (JBK no KBK). No ohin lokraik tuku 3.00 PM entrega ba eskola sekundaria Sant’Ántónio Baucau (ESSA), maské entrega ona maibé husi bairu nafatin partesipa basá ESSA parte ba bairu ida ne’e.

Maske ohin mak loron ikus ne’ebé mak ami komunidade Santa Teresa d’Avilla no sarai sira entrega ilas ba ESSA, maibé iha tempu hanesan komunidade mós halo selebrasaun ba dezafiu sira ohin loron nian ne’ebé mak fulan hirak ne’e intervista no reflete ona. Maske komunidade edukativa parte leigu sira la marka prezensa maibé selebra hodi agradese ba buat ne’ebé ami koko hodi hatan ba dezafiu sira ohin loron nian.

(Lucia Pereira)