AGRADESIMENTU HUSI IRMÁN SIRA NE’EBÉ HALO 2⁰ NOVISIADU (Fulan I)

“Iha loron 13/9/2020 ami remata ona ami-nia segundu novisiadu ba fulan ida, nune’e uluknanai ami agradese ba Maromak ba bensan no di’ak hotu ne’ebé Nia haraik mai ami durante ne’e, nu’udar oportunidade ida ba ami atu forma ami-nia-an tuir karizma Salesiana no mós hakle’an formasaun sira ne’ebé Instituto prepara nu’udar formasaun II Novisiadu nian. Iha biban ida ne’e ami mós agradese ba Inspetoria liuliu ba Me. Alma (Me. Provinsiál) ho nia konselleira sira no madre diretora ida-idak husi ami-nia komunidade, ne’ebé fo tempu mai ami atu dezenvolve no deskobre Maromak nia maravilla sira iha ami-nia moris, liuliu iha moris orasaun, misaun no komunidade. Nune’e formasaun ne’e realiza tan de’it Madre ida-idak nia domin ba Institutu no iha hakarak atu tulun ami sai tasak iha hilin sira.

Ami agradese mós ba Madre sira hotu ne’ebé akompaña ami  ho orasaun. Liuliu ba madre sira iha komunidade ne’ebé ami hela bá, ne’ebé substitui ami-nia fatin iha misaun ne’ebé ami hala’o nune’e ami bele tuir formasaun ne’e ho hakmatek. Ami agradese mós ba Madre sira ne’ebé fó formasaun mai ami iha fulan ida ne’e, ba Me. Alma, ne’ebé tulun ami atu iha laran manas liután ba apostoladu; Me. Angelita, ne’ebé tulun ami atu haburas liután ami-nia domin ba Maromak iha vida orasaun nian; Me. Evanjelina, tulun ami atu hametin relasaun komuñaun fraternal iha moris komunidade;  Me. Carolina, tulun ami atu hateke ba Maria nu’udar inan no modelu vokasaun nian iha vida konsagrada; Me. Jacinta Gusmão, tulun ami atu loke-an ba mediadora sira hodi simu akompañamentu ne’ebé di’ak  hodi dixerne ami-nia moris tuir Maromak nia hakarak; Me. Julia, tulun ami atu hametin liután ami-nia aliansa domin nian ho Kristu; ba Me. Sebastiana, ne’ebé prepara ami  atu hakle’an rituál  profisaun nian no tulun ami hatene liután  ritu ida-idak  nia sentidu no valór, no Me. Esmeralda, ne’ebé nafatin pronta no disponivel atu akompaña, hodi lori ami ba relax  iha loron sira pauza nian, ba ita boot sira nia pasiénsia, domin no laran-di’ak hodi fahe matenek, fó-an hodi akompaña no tulun ami atu deskobre liután fafurak iha vida konsagrada nian.

Nune’e ho formasaun ida-ne’e tulun tebes ami atu hafoun no haburas ami-nia domin ba JEZÚS hodi serví Nia liu husi ami-nia knaar loroloron nian iha misaun no komunidade. No orasaun sai nu’udar forsa no kbiit ba moris, atu manán buat hotu no liuliu atu tahan ami-nia fidelidade ba nafatin. Ba di’ak hotu ne’ebé ami simu iha formasaun ne’e, maibé ami nafatin presiza ita-boot sira nia tulun, iha moris espirituál, komunitária no misaun nian, atu ami bele kontinua la’o ba oin ho domin no ho ksolok Saleziana nian.  Dala ida tan Obrigada barak ba ita-boot sira hotu nia orasaun ne’ebé akompaña ami durante ami-nia formasaun.

OBRIGADA BARAK!”

(Onesiana-Marta-Fatima)