Laga – Orfaun sira hamutuk ho Irman sira hatàn ho ksolok ba dokumentus Season of Creation”. Nunee ami hahu iha semana dahuluk fulan setembru ho Mini Workshop nebe fahe ba grupu 2: Estudante basico 1-2 ciclos Ir. Angelita mak halao hamutuk ho sira no estudantes 3 ciclo Ir. Paulina. Grupu idaidak iha ninia kriatividade oinsa halao mini workshop ho efetivu. Ami mos prepara questioner atu hatene oinsa usa bee ho diak, problema lixu, sura ainfatin karbaun, problema sunu ai no ta’a ai nebe estraga ita nia foho no aihoris sira. Kada questioner ba tematiku ida iha perguntas 7. Hafoin soma valor sira husi tematiku 4 ami bele hare katak labarik sira barak mak seidauk hatene tau matan ba ambiente. Seidauk iha konsiensia atu tau matan no hadomi ambiente. konaba estraga bee, ainfatin karbaun no soe lixu arbiru indika numeru aas tebes. Sira remata sira nia workshop hodi halo Aliansa ka promesa atu konsiente liutan. Nu’udar edukadora ba labarik no foinsae sira hahalok sira nee desafia ita atu bele fo atensaun liutan no tau matan ba ambiente nudar uma komun ba ita hotu.
Atu remata ba atividades ida ohin dia 4 de Outubro ami reza terço espesial ba protesaun Maromak nia Kreasaun. Iha terço nee iha kada misteriu oferese simbol sira hanesan: anin nebe fo moris ba ita, oras nee sai foer tanba ema usa barak energia no transporte; bee nebe direitus ema idaidak nian atu asesu no hun ba moris oras nee sai preokupasaun no ema kiak barak labele asesu ba bee moos; domin ba natureza sai ameasa tan ema sunu no taa ai arbiru, oho animal sira no estraga natureza divina liuhusi soe foer arbiru, usa material nebe estraga ambiente. Terço nebe furak no animada. Iha konkluzau Ir. Angelita hatoo mensajem ba ami hotu katak Maromak kria ona mundu no entrega ba ita idaidak atu tau matan no multiplika ba buat nebe diak no furak. Maromak iha mehi ba ema idaidak atu lori nia obras kriasaun nee ba oin. Nee duni husi ba Maria tulun ita no lao hamutuk ho ita atu bele halo mundu ida nee sai furak no melhor. Buka imita tuir hahalok Saun Francisco de Assis nia moris. Halo ita nia moris sai instrumentu domin no damen nian. Damen no domin ho Maromak Nia kriasaun.

(Angelita Gomes FMA)